Systir leiðtoga Norður-Kóreu, Kims Jong-un, lenti í Suður-Kóreu í morgun. Þetta er í fyrsta sinn sem nokkur úr fjölskyldu Kims heimsækir landið síðan í Kóreustríðinu.
Kim Yo-jong er hluti af sendinefnd sem Kim Yong-nam, forseti norðurkóreska þingsins, leiðir og er mætt til Suður-Kóreu vegna Vetrarólympíuleikanna sem verða settir í dag.
Flugvél þeirra lenti á Nicheton-flugvellinum, skammt frá Seúl, í morgun.
Síðasta skyldmenni Kims til að stíga fæti í Seúl var afi hennar, Kim Il-sung, eftir að hersveitir hans réðust inn í borgina árið 1950.
Þremur árum síðar lauk átökunum á milli norðurs og suðurs með vopnahléi og skiptust löndin í framhaldinu upp í tvo hluta.
Kim Yo-jong var brosmild og virtist afslöppuð er hún kom inn í flugstöðina, umkringd fjórum öryggisvörðum.
Kim Yong-nam mun hitta Mike Pence, varaforseta Bandaríkjanna, og Shinzo Abe, forsætisráðherra Japans, í dag áður en opnunarathöfn Vetrarólympíuleikanna verður haldin.
Bandaríkjamenn og Japanar, auk Sameinuðu þjóðanna, hafa gagnrýnt stjórnvöld í Norður-Kóreu harðlega fyrir kjarnorkutilraunir sínar og eldflaugaskot.