Forsætisráðherra Ísrael ákærður fyrir spillingu

Ísraelska lögreglan mun leggja til að forsætisráðherra landsins, Benjamin Netanyahu, verði ákærður fyrir spillingu samkvæmt ísraelskum fjölmiðlum. BBC greinir frá.

Netanyahu var yfirheyrður af lögreglunni í síðasta mánuði vegna rannsóknar á ásökunum um spillingu forsætisráðherrans. Á þeim tíma sagði Netanyahu: „Ekkert mun gerast, því það er ekkert.“

Ísraelskir fjölmiðlar segja að lögreglan muni brátt tilkynna að næg sönnunargögn séu til staðar til þess að lögsækja megi forsætisráðherrann fyrir mútur og trúnaðarbresti í tveimur málum.

Í öðru málinu á Netanyahu að hafa beðið útgefanda ísraelsks dagblaðs, Yediot Aharonot, um jákvæða umfjöllun gegn því að hann myndi hjálpa til við að hindra útgáfu keppinautardagblaðs. Ritstjóri blaðsins, Arnon Mozes, mun einnig verða sóttur til saka, samkvæmt ísraelskum fjölmiðlum.

Hitt málið snýst um ásakanir þess efnis að forsætisráðherrann, sem gegnt hefur embættinu síðan 2009, hafi þegið gjafir sem nema rúmum 10 milljónum íslenskra króna frá Hollywood-auðjöfrinum Arnon Milchan og öðrum stuðningsmönnum. Milchan má einnig búast við lögsókn.

Netanyahu neitar báðum ásökunum. Lokaákvörðun um það hvort hann verði sóttur til saka liggur í höndum skrifstofu dómsmálaráðherra.

Jafnréttismálaráðherrann Ayelet Shaked hefur sagt að forsætisráðherra sem hefur verið ákærður ætti ekki að vera skylt að segja af sér.

• Blogga um frétt