Kvikmyndaframleiðandinn Harvey Weinstein hefur verið leystur úr haldi lögreglu gegn milljón dollara tryggingu, en hann var fyrr í dag handtekinn og ákærður fyrir nauðgun og fleiri kynferðisbrot gegn tveimur konum. BBC greinir frá.
Weinstein gaf sig sjálfur fram við lögreglu í morgun, en hann var svo fluttur fyrir dómara þar sem ákvörðun var tekin um að hann væri laus gegn tryggingu.
Joan Illuzzi saksóknari sagði kvikmyndaframleiðandann hafa notað stöðu sína, peninga og völd til að lokka konur í aðstæður þar sem hann gat brotið á þeim kynferðislega.
Ben Brafman, lögmaður Weinstein, ræddi við fréttamenn, fyrir utan dómshúsið og sagði að skjólstæðingur sinn myndi lýsa yfir sakleysi sínu.
„Við ætlum okkur að vinna mjög hratt og örugglega í því að fá þessar ákærur felldar niður. Við teljum að það sé stjórnarskrárlegur galli á þeim. Við teljum að þær séu raunverulega ekki studdar af sönnunargögnum,“ sagði Brafman.
Ákærur á hendur Weinstein hafa ekki verið gerðar opinberar en New York Times greinir frá því að ein sé vegna ásakana leikkonunnar Lucia Evans sem kærði hann fyrir kynferðisbrot. Ekki liggur fyrir hvort um fleiri en eina ákæru er að ræða en lögreglan í New York hefur einnig haft til rannsóknar nauðgunarkæru sem leikkonan Paz de la Huerta lagði fram á hendur honum. Fyrr í þessum mánuði lagði Netflix-framleiðandinn Alexandra Canosa einnig fram gögn í máli á hendur honum fyrir nauðgun og kynferðislega áreitni.
Tugir kvenna í kvikmyndabransanum hafa sakað Weinstein um kynferðisofbeldi, þar á meðal nauðganir, en ásakanirnar hrundu af stað #metoo-herferðinni. Sjálfur hefur hann alltaf neitað þessum ásökunum.