Erlent | mbl | 4.9.2018 | 22:33 | Uppfært 5.9.2018 0:31

Segir fjölda brottfluttra „eðlilegan“

Íbúar í Caracas, höfuðborg Venesúela, standa í röð klukkutímunum saman til að sækja lífeyrinn í bankann. AFP

Stjórnvöld í Venesúela segja fjölda þeirra Venesúelabúa sem yfirgefið hafa landið vera „eðlilegan“. Sameinuðu þjóðirnar telja 2,3 milljónir manna hafa yfirgefið Venesúela frá upphafi stjórnmála- og efnahagskreppunnar árið 2014, að því er BBC greinir frá.

Delcy Rodríguez, varaforseti Venesúela, segir „óvinaþjóðir“ hafa blásið tölurnar upp til að réttlæta hernaðaríhlutun. Rodríguez lét þessi orð falla á fundi 13 ríkja Suður-Ameríku þar sem leita átti leiða til að takast á við fólksflutningana.

Sagði hún stjórnvöld í Venesúela hafa kvartað við António Guterres, aðalframkvæmdastjóra Sameinuðu þjóðanna, yfir „einstökum starfsmönnum“ sem drægju upp mynd af „hefðbundnum fólksflutningum sem mannréttindakrísu til að réttlæta íhlutun“.

Sameinuðu þjóðirnar vöruðu í síðasta mánuði við því að það stefndi í sams konar flóttamannakrísu í Venesúela og átt hefði sér stað í löndunum við Miðjarðarhaf árið 2015.

Frétt af mbl.is

Líkir ástandinu við strauminn yfir Miðjarðarhaf

Rodríguez fullyrti hins vegar á fundinum að Sameinuðu þjóðirnar hefðu notað gögn sem „óvinaþjóðir“ hefðu látið þau fá og síðan kynnt þau „sem sín eigin“.

Þó að varaforsetinn nefndi „óvinaþjóðirnar“ ekki á nafn ásakaði hún nágrannaríkið Kólumbíu um að sækja í alþjóðlega sjóði undir því yfirskini að taka á hælisleitendum frá Venesúela við landamærin, þegar raunveruleg áætlun kólumbískra stjórnvalda væri að „lifa af“ styrkjunum.

Stjórnvöld í Venesúela kenna Kólumbíu reglulega um mörg þeirra vandamála sem koma upp í landinu, m.a. mislukkaða drónaárás á Nicolás Maduro, forseta landsins.

Rodríguez tilgreindi ekki hversu margir Venesúelabúar hefðu yfirgefið landið, en Maduro hefur áður sagt fjöldann vera „ekki meira en 600.000 á síðustu tveimur árum samkvæmt staðfestum tölum“, sem er umtalsvert lægri tala en Sameinuðu þjóðirnar hafa nefnt.