Erlent | AFP | 5.9.2018 | 19:03 | Uppfært 23:58

Segist ekki hafa viljað drepa Assad

Trump segir það ekki einu sinni hafa verið íhugað að drepa Assad. AFP

Donald Trump, forseti Bandaríkjanna, neitar því að hann hafi viljað láta drepa Bashar al-Assad, forseta Sýrlands, eftir að stjórnarherinn beitti efnavopnum á almenna borgara þar í landi í apríl á síðasta ári. AFP-fréttastofan greinir frá.

Það er fullyrt í nýrri bók blaðamannsins Bobs Woodwards um forsetann, Fear, að Trump hafi sagt að Bandaríkin ættu að drepa Sýrlandsforseta. „Drepum hann, fjandinn hafi það. Förum inn. Drepum heilan helling af þeim,“ á forsetinn að hafa sagt við ráðgjafa sína.

Bashar al-Assad í viðtali við rússneska sjónvarpsstöð. AFP

Jim Mattis, varnarmálaráðherra Bandaríkjanna, mun þá hafa lofað að brugðist yrði strax við, en hann hafi látið hugmyndina um aftökuna hverfa mjög laumulega.

Frétt af mbl.is

Með ofsóknaræði og skilning á við 10 ára

Trump sagði á blaðamannfundi í Hvíta húsinu í dag að þetta hefði aldrei gerst. „Þetta var ekki einu sinni íhugað,“ sagði hann á fundinum. „Þessi bók hefur enga þýðingu. Þetta er eingöngu skáldskápur,“ sagði forsetinn jafnframt. Þá benti hann á að Mattis og John Kelly, starfsmannstjóri Hvíta hússins, hefðu báðir neitað að atburðarás, eins og henni er lýst í bókinni, hefði átt sér stað.

Frétt af mbl.is

Segja bókina „lygar“ og „lágkúru“

Woodward segir bókina byggða á 100 klukkutíma samtölum við beina þátttakendur í atburðarásinni í Hvíta húsinu frá því Trump tók við völdum. Fjölmiðlafulltrúi Hvíta hússins sagði í yfirlýsingu sem lesin var upp í gær að bókin væri uppfull af skálduðum sögum og að miklu leyti byggð á frásögnum ósáttra fyrrverandi starfsmanna.