Mennirnir tveir sem grunaðir eru um að hafa eitrað fyrir rússneska gagnnjósnarann Sergei Skripal og Yuliu dóttur hans eru almennir borgarar, ekki glæpamenn, að því er Vladimír Pútín Rússlandsforseti fullyrðir.

Bresk yfirvöld hafa nafngreint mennina tvo og segjast telja þá Alexander Petrov og Ruslan Boshirov vera liðsmenn leyniþjónustu rússneska hersins GRU.

BBC segir Pútín hafa greint frá því að rússnesk stjórnvöld hafi haft uppi á mönnunum og að hann vonist til að þeir komi fram fljótlega og segi sögu sína.

Eitrað var fyrir Skripal feðginin í mars á þessu ári.

„Við vitum hverjir þeir eru, við erum búin að finna þá,“ sagði Pútín. „Ég vona að þeir muni gefa sig fram og segja frá. Það væri öllum fyrir bestu. Það er ekkert spennandi við þetta, ég fullvissa ykkur um að þetta er ekkert glæpsamlegt.“

Breska lögreglan segist hafa nægar sannanir til að ákæra mennina, sem eru sagðir hafa flogið frá Moskvu til Bretlands 2. mars. Tveimur dögum síðar úðuðu þeir taugaeitrinu Novichok á útidyrahurðina á heimili Skripal í Salisbury og héldu svo aftur heim til Rússlands sama dag.

Sajid Javid, innanríkisráðherra Bretlands, hefur varað mennina við að þeir verði handteknir og ákærðir yfirgefi þeir Rússland.

Tengdar fréttir

Eitrað fyrir Skripal

Grunaðir í Skripal-máli sakaðir um þátt í sprengingu

• Gagnrýnandi Pútíns kyrktur
• Boris varar Pútín við
• Ræðir Skripal-málið við Pútín
• Mikil umferð um sendiráðið fyrir tilræðið

» Fleiri tengdar fréttir

• 1 blogg um fréttina

Bloggað um fréttina

• Páll Vilhjálmsson: Pútin setur hausinn í snöruna