Ályktun um að Hamas-samtökn í Palestínu yrðu fordæmd vegna flugskeytaárása á Ísrael var hafnað á allsherjarþingi Sameinuðu þjóðanna í gær. Ályktunin var lögð fram af Nikki Haley, sendiherra Bandaríkjanna hjá SÞ, og var þetta síðasta ályktunin sem hún leggur fyrir þingið áður en hún lætur af embætti.
Haley sagði að með því að samþykkja ályktunina gæti þingið leiðrétt söguna og staðið með sannleikanum og jafnvægi sem er nauðsynlegt til að stuðla að friði í Mið-Austurlöndum.
Ályktunin er sú fyrsta sem lögð er fyrir allsherjarþingið þar sem farið er fram á að Hamas-samtökin séu fordæmd.
87 ríki greiddu atkvæði með ályktuninni, 58 á móti en 33 sátu hjá. Svo að ályktunin yrði bókuð á þinginu þurfti Haley að fá tvo þriðju hluta atkvæða sem gekk ekki eftir.
Talsmaður Hamas-samtakanna sagði niðurstöðuna vera þungt högg fyrir ríkisstjórn Donalds Trumps, forseta Bandaríkjanna.
Benjamin Netanyahu, forsætisráðherra Ísraels, sagði að þó svo að tilskildum meirihluta hafi ekki verið náð þá hafi í fyrsta sinn umfangsmikill fjöldi ríkja sameinast gegn Hamas-samtökunum.
Haley tilkynnti í október sl. að hún myndi láta af störfum í lok árs og hafa bandarískir fjölmiðlar fullyrt að Heather Nauert, talsmaður bandaríska utanríkisráðuneytisins, muni taka við stöðu sendiherra Bandaríkjanna hjá Sameinuðu þjóðunum af Haley.