14 manns hið minnsta létust er bílsprengja sprakk í sýrlensku borginni Azaz, sem uppreisnarmenn með stuðningi tyrkneska hersins hafa á valdi sínu.
Fjögur börn eru í hópi þeirra sem fórust, en sprengjan sprakk í nágrenni mosku í borginni samkvæmt upplýsingum frá sýrlensku mannréttindavaktinni Syrian Observatory for Human Rights.
Rúmlega 20 manns til viðbótar særðust í sprengingunni, en talið er að um sjálfsvígsárás hafi verið að ræða.
„Margir voru á leið brott eftir kvöldbænastund þegar sprengingin átti sér stað,“ hefur AFP-fréttaveitan eftir Abdul Rahman, einum yfirmanna mannréttindavaktarinnar.
Ekki liggur hins vegar enn fyrir hverjir standa að baki árásinni.
AFP hefur eftir Abu Youssef, íbúa í borginni, að sprengingin hafi orðið í nágrenni markaðar í miðborginni.
„Skemmdirnar eru miklar. Að minnsta kosti sex verslanir brunnu og framhliðar tuga verslana skemmdust,“ sagði Youssef.
Ekki er nema sólarhringur frá því tíu manns fórust og 20 slösuðust í svipaðri sprengingu í borginni Raqqa í norðausturhluta landsins.