Erlent | AFP | 23.8.2019 | 14:22

Sakar Bolsonaro um lygar

„Í ljósi afstöðu Brasilíu undanfarnar vikur getur forsetinn ályktað að Bolsonaro forseti hafi logið að honum í Osaka.“ AFP

Emmanuel Macron Frakklandsforseti telur að Jair Bolsonaro, forseti Brasilíu, hafi logið að honum um stefnu Brasilíu í loftslagsmálum. Því hyggst Macron nú tala gegn viðskiptasamningi Evrópusambandsins og ríkja Suður-Ameríku.

„Í ljósi afstöðu Brasilíu undanfarnar vikur getur forsetinn ályktað að Bolsonaro forseti hafi logið að honum í Osaka,“ segir talsmaður Macron, og á við fund G20 ríkjanna sem fram fór í Osaka í Japan í júní.

Frétt af mbl.is

„Heimili okkar brennur“

Talsmaður Macron segir að ummæli sem brasilískir ráðamenn hafi látið falla undanfarnar vikur gæfu til kynna að að Bolsonero hygðist ekki standa við skuldbindingar sínar í loftslagsmálum eða bregðast við ákalli um að viðhalda líffræðilegum fjölbreytileika Amazon-regnskógarins.

„Í þessum aðstæðum mun Frakkland setja sig upp á móti Mercosur [fríverslunarsamningi ESB og Suður-Ameríku].“

Macron hefur farið fram á að það sem hann kallar neyðarástand í Amazon verði rætt á fundi leiðtoga G7-ríkjanna. Nú hefur Angela Merkel, kanslari Þýskalands, tekið undir með Macron.