Tyrkneskar hersveitir hafa hafið innrás í norðausturhluta Sýrlands þar sem ætlun þeirra er að ráðast gegn Kúrdum sem hafast við á svæðinu. Recep Tayyip Erdogan, forseti Tyrklands, greindi frá því á Twitter að innrásin væri hafin.

Samkvæmt frétt AFP hafa sprengingar heyrst í sýrlenskum bæjum í grennd við landamærin. Þá sást reykjarmökkur yfir bænum Ras Al-Ain.

Þar var einnig greint frá því að fjöldi óbreyttra borgara reyndi að flýja.

Erdogan segir að aðgerðirnar beinist gegn hryðjuverkamönnum á svæðinu í norðurhluta Sýrlands. Ætlunin sé að koma í veg fyrir svæði hryðjuverkamanna rétt við tyrknesku landamærin og að koma á friði á svæðinu. 

Tyrk­nesk yf­ir­völd skil­greina her­sveit­ir Kúrda sem hryðju­verka­menn og ætla að búa til svokallað öryggissvæði á landamærunum þar sem Kúrdar hafast nú við. 

Innrás Tyrkja í Sýrland er hafin. AFP

Donald Trump Bandaríkjaforseti tilkynnti á sunnudag að bandaríski herinn yrði fluttur burt frá svæðinu, sem opnaði á leiðina fyrir innrás Tyrkja. Trump hefur hins vegar látið hafa eftir sér að of harkalegar aðgerðir af hálfu Tyrkja muni hafa í för með sér slæmar efnahagslegar afleiðingar fyrir þá. 

Kúrdar hvetja Sameinuðu þjóðirnar, mannréttindasamtök og aðrar lýðræðislegar stofnanir til að fordæma innrásina. 

Kúrdast óttast hið versta. AFP

Tengdar fréttir

Sýrland

Helsti ráðgjafi Hisbollah sá sem ráðinn var af dögum

• Fórnarlömb mannskæðrar árásar jörðuð
• Olíuflutningaskipið sagt mjög laskað
• Vill réttarhöld yfir Assad
• Jórdanar sagðir hafa fellt fíkniefnabarón

» Fleiri tengdar fréttir

• Blogga um frétt