Erlent | AFP | 14.10.2019 | 16:23 | Uppfært 7.11.2019 9:08

Krefst þess að uppljóstrarinn gefi sig fram

Þinghúsið á Capitol-hæð í Washington DC. AFP

Donald Trump forseti Bandaríkjanna krafðist þess í dag að svonefndur uppljóstrari, ónefndur starfsmaður leyniþjónustu landsins sem starfaði í Hvíta húsinu, myndi segja á sér deili og sitja fyrir svörum á Bandaríkjaþingi. Starfsmaðurinn lagði fram formlega uppljóstrunarkvörtun 12. ágúst um samskipti Trumps og Volodymyrs Zelenskí, forseta Úkraínu í símtali forsetanna í júlí.

Donald Trump forseti Bandaríkjanna. AFP

Fulltrúardeild Bandaríkjaþings, þar sem demókratar eru í meirihluta, hóf formlega rannsókn á embættisbrotum Trumps fyrir um þremur vikum síðan. Trump er sakaður um að hafa þrýst á Zelenskí í símtalinu að láta rannsaka feðgana Joe Biden, fyrrverandi varaforseta Bandaríkjanna og mögulegan keppinaut hans um forsetastólinn á næsta ári, og Hunter, son hans, vegna tengsla þess síðarnefnda við úkraínska gasfyrirtækið Burisma.

Trump hefur viðurkennt að hafa nefnt málefni feðganna í símtalinu.

Fiona Hill kemur í þinghúsið á Capitol-hæð í dag. AFP

Fiona Hill, fyrrverandi sérlegur ráðgjafi Trumps í málefnum Rússlands sem sat í öryggisráði Bandaríkjanna, situr nú fyrir svörum á lokuðum fundi þingmannanefndar fulltrúadeildar Bandaríkjaþings. Demókratar í hópi þingmanna hafa sagst búast við því að hún myndi lýsa yfir áhyggjum sínum af íhlutun Trumps í Úkraínu. Jamie Raskin, þingmaður Demókrataflokksins, sagði í dag að hann vonaðist til þess að framburður Hill myndi varpa ljósi á það sem hann sagði vera „skuggastefnu í utanríkismálum“ sem stýrt væri frá Úkraínu af Rudy Giuliani, lögmanni Trumps.

Adam Schiff, þingmaður Demókrataflokksins og formaður njósnanefndar Bandaríkjaþings. AFP

Þetta er hluti af rannsókn til undirbúnings ákæru til embættismissis gegn forsetanum og í twitter-færslu sinni fyrr í dag gagnrýndi Trump Adam Schiff, demókrataþingmann og formann njósnanefndar Bandaríkjaþings eftir að Schiff sagði að uppljóstrarinn myndi hugsanlega ekki stíga fram vegna þess að hann óttaðist um öryggi sitt.

Adam Schiff now doesn’t seem to want the Whistleblower to testify. NO! Must testify to explain why he got my Ukraine conversation sooo wrong, not even close. Did Schiff tell him to do that? We must determine the Whistleblower’s identity to determine WHY this was done to the USA..
— Donald J. Trump (@realDonaldTrump) October 14, 2019