Uppgjör í fíkniefnaheiminum er að öllum líkindum það sem varð til þess að fimmtán ára gamall strákur lét lífið í skotárás á Möllevangtorgi á laugardagskvöld. Sérstakur rannsóknarhópur hefur verið skipaður til að rannsaka fjölda ofbeldisglæpa sem framdir hafa verið í borginni undanfarnar vikur. Frá þessu var greint á blaðamannafundi sænsku lögreglunnar í morgun.
Enginn hefur verið handtekinn í tengslum við árásina á laugardag. Árásin náðist á myndbandsupptöku en hún átti sér stað um klukkan 21 að staðartíma á laugardagskvöld, fyrir framan pítsastað á torginu. Piltarnir tveir eru báðir fæddir árið 2004, en hafa þrátt fyrir ungan aldur komið við sögu hjá lögreglu, að sögn lögreglustjórans.
Stefan Hector, lögreglufulltrúi sem fór fyrir rannsókninni á hryðjuverkunum á Drottningargötunni í Stokkhólmi fyrir tveimur árum, fer fyrir rannsóknarhópnum. Hann fær til liðs við sig hóp lögreglumanna frá öðrum lögregluembættum sem og héraðslögregluembætti Suður-Svíþjóðar. Rannsóknin mun beinast að fíkniefnasölu, sem er talin vera kveikjan að árásinni um helgina.