12 ára drengur dæmdur sekur

Pilturinn var handtekinn í október. Nú hefur hann verið sakfelldur ...
Pilturinn var handtekinn í október. Nú hefur hann verið sakfelldur en endanlegur dómur verður kveðinn upp í næsta mánuði. AFP

Tólf ára gamall piltur hefur verið sakfelldur fyrir lögbrot í tengslum við mótmælin í Hong Kong. Hann er sá yngsti sem hefur hlotið dóm í tengslum við málið. Hann var handtekinn þegar hann var á leið í skólann daginn eftir mótmæli sem fóru fram í október.

Pilturinn játaði að hafa valdið skemmdum með því að spreyja slagorð á lögreglustöð og neðanjarðarlestarstöð. Dómur verður kveðinn upp yfir honum í næsta mánuði.

Fram kemur á vef BBC, að lögreglan hafi framkvæmt rúmlega 5.000 handtökur frá því mótmælin hófust í júní. Mörg börn á aldrinum 12 til 15 hafa verið handsömuð, en þetta er í fyrsta sinn sem barn er dæmt fyrir afbrot.

Mótmælin hófust í júní en hafa stigmagnast undanfarnar vikur. AFP

Saksóknarar sögðu við aðalmeðferð málsins að óeinkennisklæddur lögregluþjónn hafi séð piltinn skrifa „bölvaðir lögguþrjótar“ og  „heilög tortíming, frelsið HK“ á veggi Mong Kok-lögrelustöðvarinnar og á veggi Prince Edward-lestarstöðvarinnar 3. október.

Lögreglumaðurinn elti drenginn heim til sín og beið fyrir utan húsið um nóttina, að því er fram kemur í kínverskum fjölmiðlum. Þegar pilturinn lagði af stað í skólann kl. 7 um morguninn hafði lögreglumaðurinn af honum afskipti og framkvæmdi leit heima hjá honum, þar sem svört málning fannst.

Jacqueline Lam, l ögmaður piltsins, sagði við réttarhöldin að honum hafi verið haldið yfir nótt á lögreglustöð í kjölfar handtökunnar. Það hefði verið honum dýrmæt lexía.

„Ég bið dómstólinn um að gefa honum tækifæri,“ sagði hún. „Hann er nú aðeins 12 ára gamall.“

mbl.is