Milljarðamæringurinn Jeff Bezos, stofnandi og eigandi Amazon og ríkasti maður heims, hefur heitið 10 milljörðum Bandaríkjadala til baráttunnar gegn loftslagsbreytingum.
Upphæðina er erfitt að gera sér í hugarlund, en hún jafngildir rúmlega einni billjón íslenskra króna, það er þúsund milljörðum, eða milljón milljónum.
Bezos segir að upphæðin verði notuð til þess að fjármagna starf vísindamanna, aðgerðasinna og annarra hópa. „Ég vil vinna með öðrum að því að auka þekktar leiðir og kanna nýjar leiðir til þess að berjast gegn hrikalegum afleiðingum loftslagsbreytinga,“ skrifar Bezos.
Hann hyggst stofna Jarðarsjóð Bezos og ætlar sér að hefja úthlutun úr sjóðnum í sumar.
Jeff Bezos er eins og áður segir ríkasti maður heims og er eigið fé hans metið á um 130 milljarða Bandaríkjadala. Umrædd styrkveiting til loftslagsmála nemur því um 8% af auðæfum Bezos og hafa margir hvatt hann til þess að gera enn betur.