Kjallari fannst í garði við leit að McCann

Kjallarinn var áður undir garðhúsi sem nú hefur verið rifið.
Kjallarinn var áður undir garðhúsi sem nú hefur verið rifið. AFP

Lögreglumenn í Hannover í Þýskalandi fundu kjallara í garði sem Christian Brückner hafði til afnota. Brückner er grunaður um að hafa átt aðild að hvarfi Madeleine McCann úr hótelíbúð vorið 2007 í Portúgal.

Kjallarinn er sagður hafa verið undir garðhýsi sem stóð þar áður en er nú búið að rífa. Þýskir fjölmiðlar fylgjast vel með leitinni sem hefur staðið í nokkra daga en þýska lögreglan verst fregna. The Guardian greinir frá.

Uppgröftur í garðinum hófst fyrir tveimur dögum og eru tvær litlar gröfur notaðar í verkið. Réttarmeinafræðingar eru á svæðinu og leitarhundar eru til taks. Brückner er sagður hafa búið í húsi nálægt garðinum um skamma hríð árið 2007. Lögreglumenn hafa einnig leitað í Linden-skurðinum sem er skammt frá.

Leitarhundar eru notaðir við leitina í garðinum.
Leitarhundar eru notaðir við leitina í garðinum. AFP

Flugumferð yfir leitarsvæðið bönnuð

Rann­sókn á hvarfi Madeleine hófst að nýju í júní þegar þýsk yf­ir­völd greindu frá því að Brückner væri grunaður um aðild að hvarf­inu. Fram hef­ur komið að Þjóðverj­inn, sem er 43 ára gam­all, hafi sagt öðrum manni þar sem þeir sátu á bar að hann hefði átt aðild að hvarfi Madeleine. Eins hefði hann sýnt fé­laga sín­um mynd­skeið af sér þar sem hann nauðgar 72 ára gam­alli konu í Al­gar­ve árið 2005.

Íbúum á svæðinu er úthlutað garðspildum í garðinum og hafa þær til afnota. Íbúi sem var með afnot af garðspildu við hliðina á þeirri sem nú er verið að grafa upp sagði í samtali við þýska miðilinn Bild að kjallarinn hefði tilheyrt spildunni í „mörg ár“ og ekki hefði verið fyllt upp í hann þegar garðhýsið var rifið í lok 2007.

Lögreglan hefur lokað af svæði í kringum garðinn og sett upp skilrúm svo fjölmiðlar eða aðrir sjái ekki hvað fer fram. Þá hefur lögregla látið banna flugumferð yfir garðinn til að koma í veg fyrir að drónar eða þyrlur séu notuð til að fylgjast með uppgreftrinum.

Lögreglan hefur sett upp skilrúm svo fjölmiðlar og almenningur geti …
Lögreglan hefur sett upp skilrúm svo fjölmiðlar og almenningur geti ekki séð hvað fer fram á vettvangi. AFP

Telur að Madeleine sé látin

Lögreglan hefur ekki gefið út hvað hún vonast til að finna en hefur staðfest að leitin tengist rannsókn á hvarfi Madeleine McCann. Fyrir nokkrum vikum gerði lögreglan leit í yfirgefnu verksmiðjuhúsnæði þar sem Brückner bjó um tíma og fann þúsundir mynda á myndbandsspólum og USB-lykla sem búið var að grafa í jörð. Á þeim voru meðal annars myndir af kynferðislegri misnotkun á börnum.

Hans Christian Wolters, yfirsaksóknari í Brunswick, hefur ítrekað sagt í tilkynningum og viðtölum að rannsakendur hafi sannanir fyrir því að Brückner hafi átt aðild að hvarfi McCann. Hann hefur einnig sagt að hann telji að hún sé látin en hefur neitað að veita frekari upplýsingar.

Garðurinn sem leitað er í er á dreifbýlissvæði milli Hannover og Brunswick.

Áhugi fjölmiðla er gríðarlega mikill en lögregla verst allra fregna.
Áhugi fjölmiðla er gríðarlega mikill en lögregla verst allra fregna. AFP
mbl.is