Fyrsti rússneski hermaðurinn sem réttað hefur verið yfir vegna stríðsglæpa í Úkraínu bað um fyrirgefningu í dómsal í Kænugarði, höfuðborg Úkraínu, í morgun.
Þar lýsti hann því í smáatriðum hvernig hann drap almennan borgara fljótlega eftir að innrás Rússa í Úkraínu hófst.
„Ég veit að þú munt ekki fyrirgefa mér en samt sem áður þá bið ég þig um fyrirgefningu,“ sagði Vadím Shishimarín, 21 árs hermaður, í dómsalnum.
Ávarpaði hann þar ekkju 62 ára manns sem hann viðurkenndi að hafa drepið á fyrstu dögum innrásarinnar.
Alþjóðlegi stríðsglæpadómstóllinn (ICC) hefur sent stærsta vettvangsteymi í sögu dómstólsins til Úkraínu. Í teyminu eru 43 rannsakendur, réttarmeinafræðingar og aðstoðarfólk sem munu safna sönnunargögnum um meinta stríðsglæpi.