Ferðamenn virtu viðvörunarskilti að vettugi við Gullfoss í gær þar sem varað er við hættulegum aðstæðum, eins og sjá má í myndbandi sem ökumaður hjá fyrirtækinu Grayline sem var staddur á svæðinu sendi mbl.is.
Einn ferðamannanna hunsaði einnig viðvaranir ökumannsins, sem benti honum á hættuna á svæðinu vegna snjósins og hálkunnar sem þar er.
„Við stoppuðum þarna í eina klukkustund. Ég ákvað að stunda mína líkamsrækt með því að ganga upp og niður stigann fjórum sinnum,“ segir ökumaðurinn Petra Albrecht frá Hollandi, og á við stigann á milli neðra og efra svæðis við Gullfoss.
Hún segist hafa horft á ferðamennina virða viðvörunarskiltið að vettugi í um tuttugu mínútur áður en hún ákvað að taka upp myndbandið.
Þar má meðal annars sjá ferðamenn klifra yfir viðvörunarskiltið en sjón er sögu ríkari.
Þetta er ekki í fyrsta sinn sem ferðamenn hunsa viðvaranir við Gullfoss.