Innlent | mbl | 8.5.2018 | 11:58 | Uppfært 14:31

„Leitt að sjá á eftir góðu fólki“

Tónlistar- og ráðstefnuhúsið Harpa. mbl.is/Júlíus

Í yfirlýsingu frá Hörpu vegna uppsagna þjónustufulltrúa kemur fram að stjórnendum þyki mjög leitt að sjá á eftir góðu fólki sem hafi starfað þar til lengri eða skemmri tíma en telur sig ekki eiga samleið með fyrirtækinu áfram.

Frétt af mbl.is

Bíða spenntir eftir niðurstöðu fundar

Sautján uppsagnir hafa borist

Alls hafa sautján uppsagnir borist. Uppsagnarfrestur er þrír mánuðir og munu aðilar í framhaldinu fara yfir næstu skref.

„Framkvæmdastjórn Hörpu virðir að sjálfsögðu þessa ákvörðun þeirra þjónustufulltrúa sem sagt hafa upp störfum og óskar þeim velfarnaðar,“ segir yfirlýsingunni.

Fram kemur að rekstur Hörpu hafi verið þungur um árabil en þar eru 117 einstaklingar á launaskrá.

„Á síðasta ári gerðu eigendur og stjórn skýra kröfu um að ráðist yrði í aðgerðir til að bæta reksturinn og draga úr tapi. Síðastliðið sumar hófst endurskoðun á öllum rekstrarþáttum Hörpu og mun sú vinna standa yfir næstu misserin.“

Frétt af mbl.is

Þjónustufulltrúar í Hörpu segja upp

Laun stjórnenda ekki undanskilin endurskoðun

Einnig kemur fram í yfirlýsingunni að hagræðingaraðgerðir í Hörpu tengist ekki aðeins launakostnaði heldur einnig kostnaði við rekstur fasteignar, aukinni tekjuöflun og fleiru.

„Þessar aðgerðir voru þegar farnar að skila árangri á síðasta ári þegar rekstur Hörpu batnaði á milli ára í fyrsta sinn; þær eru enn í fullum gangi og í því efni er allt til endurskoðunar líkt og kom ítrekað fram á fundinum og eru það laun stjórnenda ekki undanskilin.“

Svanhildur Konráðsdóttir, forstjóri Hörpu. mbl.is/Styrmir Kári

Sömu aðgerðum ekki beitt á öllum sviðum

Hvað þjónustufulltrúa varðar kemur fram að eldri samningum hafi verið sagt upp síðastliðið haust með fjögurra mánaða fyrirvara. Fullt samráð hafi verið haft við stéttarfélag og trúnaðarmann starfsmanna.

„Þjónustufulltrúum bauðst nýr samningur sem tók gildi um sl. áramót sem felur í sér 15% yfirborgun frá kjarasamningi og var þetta ein af fjölmörgum aðgerðum við að draga úr kostnaði við viðburðahald. Störf þjónustufulltrúa eru unnin í tímavinnu og tengjast nánast einvörðungu viðburðahaldi í húsinu,“ segir í yfirlýsingunni.“

„Langflestir sinna þessu sem hlutastarfi með námi og einkennist ráðningarsambandið af miklum sveigjanleika hvað varðar tíma og vinnu sem innt er af hendi. Þvert á það sem kemur fram í yfirlýsingu þjónustufulltrúa var því aldrei haldið fram við þá eða aðra starfsmenn Hörpu að sömu aðgerðum yrði beitt á öllum sviðum, enda eru allir kostnaðarþættir í rekstri fyrirtækisins til skoðunar.“

Tímabundin launalækkun forstjóra til 1. júlí

Einnig segir að þvert á fréttaflutning í síðustu viku hafi laun forstjóra ekki verið hækkuð um 20% eftir 2 mánuði í starfi heldur hafi hann tekið á sig tímabundna launalækkun til 1. júlí.

„Ástæður þessa eru að fyrsti úrskurður kjararáðs um laun forstjóra Hörpu barst eftir að gengið hafði verið frá ráðningu og gilti sá úrskurður þar til að breytt ákvæði laga um kjararáð tóku gildi. Laun forstjóra Hörpu lækkuðu því á síðasta ári frá þeim forsendum sem lágu til grundvallar ráðningunni.“

Yfirlýsingin í heild sinni:

„Þjónustufulltrúum Hörpu var boðið til fundar með forstjóra og fjármálastjóra, yfirmanni tæknisviðs og skipuleggjanda vakta þeirra í dagslok í gær og var tilefni fundarins umfjöllun fjölmiðla um óánægju þeirra vegna launamála. Fundurinn var yfirvegaður og hreinskiptinn. Farið var yfir allar staðreyndir varðandi laun forstjóra, ýmis mál er snerta störf þjónustufulltrúa rædd og hlustað á sjónarmið allra sem kusu að tjá sig.

Rekstur Hörpu hefur verið þungur um árabil og á síðasta ári gerðu eigendur og stjórn skýra kröfu um að ráðist yrði í aðgerðir til að bæta reksturinn og draga úr tapi. Síðastliðið sumar hófst endurskoðun á öllum rekstrarþáttum Hörpu og mun sú vinna standa yfir næstu misserin. Aðgerðir til að bæta rekstur birtast með ýmsum hætti á mismunandi starfssviðum Hörpu. 117 einstaklingar eru á launaskrá hjá Hörpu. Allir starfsmenn félagsins, þjónustufulltrúar sem aðrir, hafa lagt sitt lóð á vogarskálarnar með breytingum á vinnufyrirkomulagi og kjörum en einnig með auknu vinnuframlagi þar sem ekki er ráðið í laus störf og mönnun á mörgum sviðum minnkuð þar sem sem því hefur verið við komið.

Hvað þjónustufulltrúa varðar þá var eldri samningum sagt upp sl. haust með fjögurra mánaða fyrirvara. Var haft fullt samráð við stéttarfélag og trúnaðarmann starfsmanna í þessum ferli. Þjónustufulltrúum bauðst nýr samningur sem tók gildi um sl. áramót sem felur í sér 15% yfirborgun frá kjarasamningi og var þetta ein af fjölmörgum aðgerðum við að draga úr kostnaði við viðburðahald. Störf þjónustufulltrúa eru unnin í tímavinnu og tengjast nánast einvörðungu viðburðahaldi í húsinu. Langflestir sinna þessu sem hlutastarfi með námi og einkennist ráðningarsambandið af miklum sveigjanleika hvað varðar tíma og vinnu sem innt er af hendi. Þvert á það sem kemur fram í yfirlýsingu þjónustufulltrúa var því aldrei haldið fram við þá eða aðra starfsmenn Hörpu að sömu aðgerðum yrði beitt á öllum sviðum, enda eru allir kostnaðarþættir í rekstri fyrirtækisins til skoðunar.

Þær fjölmörgu aðgerðir sem ýmist hafa verið settar af stað eða eru í vinnslu og er ætlað að stuðla að hagræðingu í rekstri Hörpu, tengjast langt í frá aðeins hagræðingu í launakostnaði heldur einnig kostnaði við rekstur fasteignar, aukinni tekjuöflun og fleiru. Þessar aðgerðir voru þegar farnar að skila árangri á síðasta ári þegar rekstur Hörpu batnaði á milli ára í fyrsta sinn; þær eru enn í fullum gangi og í því efni er allt til endurskoðunar líkt og kom ítrekað fram á fundinum og eru það laun stjórnenda ekki undanskilin.

Á fundinum var einnig farið yfir staðreyndir er varða laun forstjóra Hörpu líkt og yfirlýsing stjórnar hefur rakið, þar sem fram kemur að þvert á fréttaflutning í síðustu viku voru laun forstjóra ekki hækkuð um 20% eftir 2 mánuði í starfi heldur tók hann á sig tímabundna launalækkun til 1. júlí. Ástæður þessa eru að fyrsti úrskurður kjararáðs um laun forstjóra Hörpu barst eftir að gengið hafði verið frá ráðningu og gilti sá úrskurður þar til að breytt ákvæði laga um kjararáð tóku gildi. Laun forstjóra Hörpu lækkuðu því á síðasta ári frá þeim forsendum sem lágu til grundvallar ráðningunni.

Harpa er gefandi og góður vinnustaður og telur sig greiða samkeppnishæf laun. Það er mjög leitt að sjá á eftir góðu fólki sem starfað hefur í Hörpu sem þjónustufulltrúar til lengri eða skemmri tíma en telur sig ekki eiga samleið með fyrirtækinu áfram, en 17 uppsagnir hafa borist. Uppsagnarfrestur er þrír mánuðir og munu aðilar fara í framhaldinu yfir næstu skref. Framkvæmdastjórn Hörpu virðir að sjálfsögðu þessa ákvörðun þeirra þjónustufulltrúa sem sagt hafa upp störfum og óskar þeim velfarnaðar.“