Vildarbörn styrktu eitt hundrað manns

Styrkþegar, velunnarar og aðrir stilltu sér upp við styrkveitinguna í …
Styrkþegar, velunnarar og aðrir stilltu sér upp við styrkveitinguna í dag. Ljósmynd/Icelandair

28 börnum og fjölskyldum þeirra, samtals rúmlega eitt hundrað manns, var afhentur ferðastyrkur úr sjóði Vildarbarna Icelandair í dag, að því er fram kemur í tilkynningu frá Icelandair. Alls hafa 677 fjölskyldur notið stuðnings frá sjóðnum frá stofnun hans fyrir 16 árum og úthlutunin í dag var sú 32. í röðinni.  

„Starfsemi Vildarbarna Icelandair byggir á hugmyndum og starfi Peggy Helgason, eiginkonu Sigurðar Helgasonar, sem lengi var forstjóri Flugleiða og stjórnarformaður Icelandair Group, en Peggy hefur um árabil unnið sem sjálfboðaliði á barnadeildum sjúkrahúsa í Reykjavík og stutt fjölskyldur fjölda veikra barna með ýmsum hætti. Hún situr í stjórn Vildarbarna Icelandair og er Sigurður formaður stjórnarinnar. Vigdís Finnbogadóttir er verndari sjóðsins,“ segir í tilkynningunni, en markmið sjóðsins er að gefa langveikum börnum eða börnum sem búa við erfið skilyrði, og fjölskyldum þeirra, tækifæri til þess að fara í draumaferð sem þau ættu annars ekki kost á.

Peggy og Sigurður gáfu 20 milljónir í ár

„Sjóðurinn er fjármagnaður með beinu fjárframlagi Icelandair, frjálsum framlögum félaga í Saga Club Icelandair sem geta gefið af Vildarpunktum sínum, með söfnun myntar um borð í flugvélum Icelandair, sölu á Vildarenglinum um borð í vélum Icelandair og söfnunarbaukum á Keflavíkurflugvelli og söluskrifstofum Icelandair. Einnig koma til frjáls framlög og viðburðir,“ segir í tilkynningu Icelandair.

Hjónin Peggy Helgason og Sigurður Helgason gáfu sjóðnum 20 milljónir sem sérstakt framlag í ár til þess að efla styrk sjóðsins enn frekar. „Það er okkur mikil ánægja að geta styrkt hina góðu starfsemi Vildarbarna, sem við höfum tekið þátt í með mikilli ánægju frá upphafi,“ sögðu hjónin við afhendinguna í morgun.

Í hverjum styrk frá sjóðnum felst skemmtiferð fyrir barnið og fjölskyldu þess, og er allur kostnaður greiddur, þ.e. flug, gisting, dagpeningar og aðgangseyrir að sérstökum viðburði sem barnið óskar sér. 

Við afhendinguna í morgun skemmti Flugfreyjukór Icelandair viðstöddum með söng. Þá afhentu Sambíóin börnunum bíómiða líkt og fyrri ár.

mbl.is