Marglytturnar, sex íslenskar sundkonur, luku við 34 kílómetra boðsund yfir Ermarsundið nú á tíunda tímanum. Hópurinn lagði af stað klukkan sex í morgun frá höfninni í Dover á Englandi og var Sigurlaug María Jónsdóttir fyrsta marglyttan sem stakk sér til sunds.

Halldóra Gyða Matthíasdóttir Proppé lauk sundinu og er hópurinn kominn til hafnar í Cap Gris Nez í Frakklandi. Sundið tók fimmtán klukkutíma og hver og ein marglytta synti um klukkustund í einu í fyrirfram ákveðinni röð. Fyrst lagði Sigurlaug María Jónsdóttir af stað, síðan tók Sigrún Þ. Geirsdóttir við og þar á eftir synti Halldóra Gyða Matthíasdóttir. Næst á eftir henni synti Birna Bragadóttir, síðan tók Þórey Vilhjálmsdóttir við og  Brynhildur Ólafsdóttir var síðust í röðinni. Þannig var jafnframt önnur sundlotan og þrjár fyrstu sundkonurnar í röðinni syntu þrisvar sinnum.

Veðrið lék við Marglytturnar, loksins þegar þær gátu hafið sundið. Ljósmynd/Marglytturnar

Sundið gekk nokkuð áfallalaust fyrir sig og byrjaði vel í þokkalega lygnum sjó og hlýju veðri. Um miðbik sundsins og þær komnar yfir í landhelgi Frakklands tók að bæta í vind og syntu þær lengi í miklum öldugangi. Á sjöunda tímanum í kvöld tók róðurinn að þyngjast með auknum öldugangi og straumum. Sundkonurnar urðu nær allar sjóveikar sem hægði á sundinu og gerði veruna um borð í bátnum erfiðari.

Sigrún Þ. Geirsdóttir, þaulreynd Ermarsundsdrottning sem sjá má á sundi í myndskeiðinu hér að ofan, rann og datt þegar hún kom um borð í bátinn eftir sitt annað sund.

Frétt af mbl.is

Synti klukkustund skemur en hún hélt

Þá missti Þórey Vilhjálmsdóttir jafnvægið og rak höfuðið í þegar hún var nýkomin um borð eftir sitt annað sund, en þá var veltingurinn orðinn mikill að sögn Soffíu Sigurgeirsdóttur, skipuleggjanda hópsins. 

Marglytturnar nú í morgun ásamt skipstjóra fiskibátsins Rowena, sem fylgir Marglyttunum eftir alla leið til Frakklands og og sinnir jafnframt eftirliti með skiptingum sundkvennanna. Ljósmynd/Marglytturnar

Komust í gegnum „grafreit draumanna“

Sjórinn var mjög gárugur og straumóttur undir lok sunds þegar marglytturnar voru komnar að svæði sem nefnist „grafreitur draumanna“, síðustu kílómetrunum að strönd Frakklands þar sem sjávarföllin hafa oftar en ekki reynst sundmönnum of sterk og borið þá frá landi. Marglytturnar voru staðráðnar í að klára sundið og það gekk eftir. 

Ferlið hefur verið langt og strangt síðustu tvö ár og tilgangur sundsins hefur aldrei gleymst, það er að sporna gegn plastmengun í hafi. Mark­miðið með sund­ferðinni er að vekja at­hygli á áhrif­um plast­meng­un­ar á lífríki sjávar og mik­il­vægi þess að vernda auðlind­ir hafs­ins en ástand lífríkis í Erm­ar­sund­inu er mjög slæmt.

„Efst í huga okkar Marglyttanna eftir sundið er þakklæti fyir að hafa náð að synda yfir Ermarsundið og láta þannig drauma okkar rætast. Við erum ánægðar að hafa hreyft við umræðunni um alvarlegar afleiðingar plastmengunar í sjó og sérstaklega glaðar að safna styrkjum fyrir Bláa herinn,“ segja Marglytturnar Silla Maja, Halldóra, Birna, Brynhildur, Sigrún og Þórey.

Mar­glytt­ur eru að safna áheit­um fyr­ir Bláa her­inn í gegn­um AUR-appið í síma 788-9966, einnig er hægt að leggja inn fjár­hæð á reikn­ing 0537-14-650972, kt. 250766-5219.

Sundið tók tæpa sextán klukkutíma og hver og ein marglytta synti um klukkustund í einu í fyrirfram ákveðinni röð. Ljósmynd/Marglyttur

Tengdar fréttir

Marglyttur synda yfir Ermarsund

Andstyggilegt en samt svo gaman

• Þyngra í Marglyttum vegna veðurs og kulda
• Þurfa að synda í gegnum stóran olíuflekk
• Þóreyju flökurt síðustu mínúturnar í sjónum
• Marglytturnar lagðar af stað yfir Ermarsund

» Fleiri tengdar fréttir

• Blogga um frétt