Varnargarður treystur á fyrsta degi engra smita

Sigurgeir Sigmundsson yfirlögregluþjónn hjá flugstöðvardeild er þakklátur yfirvöldum fyrir að …
Sigurgeir Sigmundsson yfirlögregluþjónn hjá flugstöðvardeild er þakklátur yfirvöldum fyrir að koma á skimunarskyldu við landamæri. Ljósmynd/Lögreglan

Yfirlögregluþjónn hjá flugstöðvardeild lögreglunnar á Suðurnesjum líkir nýju fyrirkomulagi við landamæri Íslands við það að nú hafi verið fyllt í skarð í varnargarði Íslendinga við kórónuveirunni. 

Nú er öllum sem koma til landsins skylt að fara í sýnatöku á flugvellinum og síðan um fimm daga sóttkví þar til kemur að sýnatöku númer tvö.

„Það er mjög þakkarvert að ríkisstjórnin hafi ákveðið að fara þessa leið,“ segir Sigurgeir Sigmundsson yfirlögregluþjónn í samtali við mbl.is.

„Ef við líkjum landamærunum í heimsfaraldri við varnargarð má segja að sprungan í honum hafi verið þessi valkostur um tveggja vikna sóttkví án skimunar. Með því að banna hana erum við búin að fylla í sprunguna á sama tíma og uppistöðulónið hinum megin er einmitt að fyllast,“ segir Sigurgeir.

Fullt uppistöðulón stendur í þessu samhengi fyrir þann ískyggilega vöxt sem faraldurinn er í í flestum nágrannalöndum, þar sem ný og hugsanlega meira smitandi afbrigði Covid-19 ríða húsum.

Fjöldi véla hefur lent á Keflavíkurflugvelli frá því breytingarnar tóku …
Fjöldi véla hefur lent á Keflavíkurflugvelli frá því breytingarnar tóku gildi á miðnætti í gær og segir Sigurgeir að engin vandræði hafi komið upp við að framfylgja nýjum reglum. mbl.is/Þorvaldur Örn Kristmundsson

Sigurgeir segir að lögreglumenn og aðrir starfsmenn á flugvellinum hafi staðið í því frá því að sýnatökur hófust á flugvellinum í vor að reyna að fá þá, sem ekki vildu fara í sýnatöku, til þess að fara þó.

Í lok október lét Sigurgeir starfsfólk sitt byrja að halda utan um þann fjölda sem upprunalega vildi ekki fara í sýnatöku en var sannfærður um að gera það á svæðinu. Þessi hópur telur nú 210 manns, sem án fortölulistar flugvallarstarfsfólks hefði hugsanlega farið smitað inn í landið án þess að vita af því.

Ekkert smit

Ekkert kórónuveirusmit greindist á landinu síðasta sólarhring. Svo fá hafa þau ekki verið mánuðum saman. Sigurgeir segir skimunarskyldu á landamærum áhrifaríka ráðstöfun til þess að tryggja að þróunin verði áfram svo hagfelld innanlands.

„Við þekkjum hættuna. Það þarf ekki nema eitt par að koma inn í landið og smita frá sér,“ segir Sigurgeir. Hann bendir á að upptök þeirrar veiru sem Íslendingar eru enn að glíma við í dag séu ekki mikilfenglegri en þetta, að tveir hafi komið inn í landið, farið á svig við sóttkví og þar með hrundið faraldrinum af stað á ný.

Nú minnka líkurnar verulega á að fólk fari óafvitandi smitað inn í samfélagið, enda er sérhver farþegi skikkaður í skimun. Sú er gjaldfrjáls eins og hún hefur verið frá því í desember. Þegar gjaldið var fellt niður voru áhrifin strax nokkur að sögn Sigurgeirs, sem segir að þá strax hafi þeim fækkað mjög sem skirrðust við að láta skima sig.

mbl.is