Á laugardaginn rennur upp stór dagur þegar lokakvöld Söngvakeppni evrópskra sjónvarpsstöðva ber upp á sama kvöld og sveitarstjórnarkosningar verða haldnar hérlendis. Í kvöld keppir Ísland í undankeppni Eurovision þar sem att er kappi í undanriðli. Tíu lönd komast áfram úr hvorum riðli en seinni undanriðillinn fer fram á fimmtudag.
Mikil spenna er meðal landsmanna fyrir hvoru tveggja og tók mbl.is stöðuna á gestum og gangandi í miðbæ Reykjavíkur í sólinni í dag og spurði um sveitarstjórnarkosningarnar og sigurlíkur Íslands í Eurovision.
Karen Jacobsen, veitingastjóri Sæta svínsins, spáir Íslandi ekki áfram í undanriðli söngvakeppninnar í kvöld.
Sævar Helgi Örnólfsson, yfirbarþjónn Fjallkonunnar, segist ekki ákveðinn varðandi hvað hann ætlar sér að kjósa í sveitastjórnarkosningunum og spáir Íslandi ekki áfram í kvöld.
Haukur Ingi Jónsson segist einnig óákveðinn um hvað hann ætlar að kjósa. Hann starfar í miðbæ Reykjavíkur og segist vera óánægður með meirihlutann. Haukur er jákvæður varðandi gengi Íslands í Eurovision í kvöld og spáir Íslandi hinu margumtalaða 16. sæti í lokakeppninni á laugardaginn.
Regin Jacobsen segist vera ákveðinn varðandi hvað hann muni kjósa í sveitarstjórnarkosningunum en vill þó ekki gefa það upp. Hann spáir því að Ísland komist áfram í kvöld og lendi í 12. sæti í úrslitunum.
Þau Aðalsteinn Halldórsson og Eva Laufey Eggertsdóttir segjast bæði vera óákveðin um hvað þau skuli kjósa og hafi verið að ræða kosningarnar í þann mund sem blaðamann bar að. Aðalsteinn spáir Íslandi áfram í kvöld og vonast til þess að Ísland nái 15. og jafnvel 14. sæti í úrslitunum á laugardaginn.
Eva Laufey segir íslenska lagið mjög krúttlegt og sætt en spáir því þó ekki áfram í kvöld.
Eiríkur Stefánsson segist vera handviss um að hann muni kjósa Pírata á laugardaginn kemur en er hins vegar neikvæður á gengi Íslands í Eurovision í kvöld og spáir okkur ekki áfram.
Elín Sigrún Jónsdóttir er ákveðin um hvað hún muni kjósa án þess þó að vilja gefa það upp. Hún spáir því að Ísland falli úr leik í undanriðli Eurovision í kvöld.
Síðast en ekki síst rakst blaðamaður á Alexöndru Ýri van Erven, ritara Samfylkingarinnar, sem segist munu kjósa sinn flokk á laugardag. Hún spáir því að Ísland komist upp úr undanriðlinum í kvöld og nái 17. sæti í lokakeppninni á laugardag.