Tveir karlmenn hafa verið ákærðir fyrir að sviðsetja umferðarslys í Hafnarfirði árið 2021 og reynt að svíkja út bætur frá tryggingafélagi. Eru mennirnir ákærðir fyrir tilraun til fjársvika.
Ákæran í málinu er birt með auglýsingu í Lögbirtingablaðinu þar sem annar mannanna er búsettur erlendis og ekki hefur tekið að birta honum ákæruna með öðrum hætti.
Mennirnir eru báðir á þrítugsaldri, en í ákærunni kemur fram að þeir hafi sett á svið umferðarslys á gatnamótum Breiðhellu og Gjáhellu í Hafnarfirði í apríl 2021 í því skyni að svíkja út vátryggingabætur á grundvelli kaskótryggingar og lögboðinnar ökutækjatryggingar hjá VÍS. Var um að ræða skemmdir á tveimur ökutækjum.
Lýst er því hvernig sá sem búsettur er erlendis hafi ekið norður Gjáhellu og stöðvað ökutækið við gatnamótin fyrrnefndu. Þar var hann kyrr í um 40 sekúndur, en ók svo bifreiðinni hægt í veg fyrir hina bifreiðina, sem maðurinn sem búsettur er á Íslandi, ók. Varð þetta þess valdandi að árekstur ökutækjanna varð á gatnamótunum.
Mennirnir undirrituðu báðir tjónstilkynningu sama dag og sendi annar þeirra hana inn til VÍS.
Segir í ákærunni að með þessu hafi þeir beitt blekkingum til að fá VÍS til að bæta tjón, en áætlaður kostnaður af yfirtöku bifreiðanna var 800 þúsund og 400 þúsund krónur.