Vildu Heimi og Lagerbäck sem forseta
Setja bókamerki
Nokkrir kjósendur í Suðurkjördæmi misskildu forsetakosningarnar illa í gær eða, það sem er öllu líklegra, reyndu að vera sniðugir í kjörklefunum og rituðu nöfn þjóðþekktra einstaklinga á kjörseðlana.
Karl Gauti Hjaltason, formaður yfirkjörstjórnar Suðurkjördæmis og skólastjóri lögregluskólans, segir að nöfn á borð við Lars Lagerbäck, Ólaf Ragnar Grímsson og Heimi Hallgrímsson, „helstu hetju kjördæmisins“ þessa dagana að sögn Karls Gauta, hafi verið rituð á kjörseðla.
„Þessi atkvæði voru reyndar ógild en þetta er alltaf svona. Sumir vilja vera skemmtilegir í kjörklefunum, fyllast einhverjum galsa og krota einhver skilaboð til okkar. Atkvæðin eru ógild engu að síður þótt skemmtilegt sé,“ segir Karl Gauti.
Hann segir lítið hafa verið um vísur og ljóð, oft hafi verið mun meira um slíkt. „Ég velti fyrir mér hvort kjósendur séu hættir að kveða,“ segir Karl Gauti glettinn. „Við höfum oft fengið tíu til fimmtán vísur,“ segir Karl Gauti og bætir við að þær fáu vísur sem kjörstjórninni hafi borist hafi verið illa kveðnar.
Talningin gekk mjög vel fyrir sig í Suðurkjördæmi þar sem munurinn var minnstur á öllu landinu á þeim Guðna Th. Jóhannessyni og Höllu Tómasdóttur.
„Við biðum mjög lengi eftir Hornafjarðarkössunum. Við vorum búin að telja mest af hinu en Hornafjarðarkassarnir komu ekki fyrr en hálffimm í nótt,“ segir Karl Gauti sem segir það allt saman eðlilegt að kassarnir hafi komið svo seint því það taki alltaf sinn tíma að keyra með kjörseðlana suður til Selfoss þar sem talningin fer fram.
Tveir í bílnum sem lenti utan vegar
Skar höfuðleðrið af íslenskri konu
„Hvílir mikil leynd yfir þessu öllu“
Banna mengandi búnað sem leyfður er á Íslandi
Væri að ljúga ef ég segðist ekki stressaður
Kostnaður meiri en milljón á fermetra
Handteknir eftir myndatöku í Vesturbæjarlaug
Sex hafa greinst með listeríu