Líkamsklukkan sögð tengjast geðheilsu

Vísindamenn segja að líkamsklukkan sé tengd geðheilsu manna, en geta …
Vísindamenn segja að líkamsklukkan sé tengd geðheilsu manna, en geta ekki fullyrt um orsakasamhengi. AFP

Þegar líkamsklukkan truflast getur það haft afleiðingar fyrir geðheilsu manna, samkvæmt niðurstöðum sálfræðirannsóknar sem birt var í vísindatímaritinu Lancet Psychiatry. Þetta kemur fram í frétt BBC.

Rannsóknin náði til 91 þúsund einstaklinga og komust rannsakendur að því að trufluð líkamsklukka tengist þunglyndi, geðhvörfum og öðrum geðröskunum.

Það má segja að klukka tifi í hverri einustu frumu líkamans og hefur takturinn áhrif á hegðun vefja. Vísindamennirnir sögðu að niðurstöðurnar varúðarmerki sem benda til þess að samfélagið sé að þróast frá því að fylgja náttúrulegum takti líkamans.

Daniel Smith, prófessor við Glasgow Háskóla, sagði í samtali við BBC að sumir einstaklingar í könnuninni sem áttu við svefntruflanir að stríða gætu verið tíðir notendur samfélagsmiðla á kvöldin og á nóttinni. Það var þó ekki sérstaklega skoðað.

Þátttakendur í rannsókninni gengu um með búnað sem fylgdist með hegðun þeirra til þess að mæla hversu trufluð líkamsklukkan væri. Þeir sem mældust með virkni á nóttu og litla virkni að degi voru skilgreindir sem einstaklingar úr takti við líkamsklukku sína. Þeir sem voru úr takti voru að jafnaði 6-10% líklegri til þess að vera með einhverja geðröskunargreiningu, en þeir sem voru virkir að degi og minna að nóttu.

Smith sagði þetta ekki gríðarlegan mun, en að það gæfi einhverjar vísbendingar um tengsl milli líkamsklukku og geðraskana. Þó er ekki ljóst hvort geðraskanir orsakast af því að fólk sé ekki í takti við líkamsklukku sína, eða hvort fólk sé ekki í takti vegna geðraskana.

Áður hafa vísindamenn hlotið verðlaun vegna rannsókna sem sýna fram á hlutverk líkamsklukkunnar.

mbl.is
Fleira áhugavert
Fleira áhugavert