Batman og Catwoman opnuðu Fremri Laxá

Fjórða árið í röð var það veiðihópurinn Veiðipöddurnar sem opnaði Fremri Laxá á Ásum. Það eru sex konur sem skipa hópinn og eru þær orðnar hagvanar. Veiðin var býsna róleg í opnunarhollinu. Vissulega settu þær í þó nokkra en lönduðu ekki nema sjö urriðum.

„Áin er mjög vatnsmikil og hröð og það held ég að sé helsta ástæðan að veiðin er miklu minni en til dæmis í fyrra þegar við fengum betri skilyrði,“ sagði Guðfinna Pétursdóttir í samtali við Sporðaköst.

Þorgerður Ólafsdóttir með fallegan urriða úr Fremri. Eins og sjá má á umhverfinu var áin mjög vatnsmikil og flæddi langt upp á bakka. Ljósmynd/Veiðipöddur

Þær hafa verið með þemakvöld í sínum veiðiferðum, eins og vinsælt er í kvennahollum. Nú breyttu þær hins vegar út af vananum. Í stað þemakvölds var meginþema í allri ferðinni. „Það var ofurhetjuþema. Hér voru Batman, Catwoman og skjaldbökurnar og fleiri úr þeim hópi,“ upplýsir Guðfinna hlæjandi.

Þær hafa gert vel við sig í mat og drykk. Kjúklingur, og svo var austurrískur dagur með öllu tilheyrandi, meira að segja súrkáli. Risarækjur og loks snitsel í kvöldmatinn í síðasta kvöldið.

Guðfinna Pétursdóttir fékk þennan á mjög ljóta flugu að eigin sögn. Rauð og græn fluga en hann vildi hana. Mældist 46 sentímetrar. Ljósmynd/Veiðipöddur

„Við erum búnar að vera mjög duglegar og reyna nánast allt. Allt frá þyngdum túbum, yfir í litlar púpur og allt þar á milli. Ég fékk einn mjög fallegan urriða á mjög ljóta flugu. Hún var rauð og græn og hann tók hana. Rétt tæpir fimmtíu sentímetrar. En við höfum líka verið að missa svolítið. En þetta er mun minni veiði hjá okkur en í fyrra. Það var líka alger mettúr.

Frétt af mbl.is

Opnunarhollið landaði 93 fiskum

Þær sakna svo sannarlega Gíma leiðsögumanns sem hefur verið með þeim síðastliðin þrjú ár en komst ekki núna. En aðstæður hafa verið virkilega erfiðar. Þessu mikla vatnsmagni hefur fylgt að slóðar hafa verið ófærir og því þurftu veiðipöddurnar að labba allt sem farið var og dró það eðlilega mikið úr yfirferð en svæðið er sjö kílómetra langt.

Hér er metnaður í gangi. Vasapeli með árituðu logo og nafni. Veiðipöddur. Ljósmynd/Veiðipöddur

En þetta er hluti af því að kynnast veiðisvæði. Upplifa erfiðu tímana og þá kunna flestir betur að meta þegar ævintýrin gerast eins og þær upplifðu í fyrra þegar Veiðipöddur voru í mokveiði. Á þessum tíma árs er veðrið oft stærsti áhrifavaldurinn og þeir fengu svo sannarlega að upplifa það.

„Þetta var svo ofboðslega gaman. Við ætlum ekki að sleppa þessu holli. Erum þegar farnar að skipuleggja tíu ára afmælið,“ skellihlær Guðfinna.

Fremri Laxá fellur úr Svínavatni í Laxárvatn. Laxá á Ásum á svo upptök sín úr þessu sama vatni. Veiðin í Fremri laxá er getur verið ævintýraleg en þar veiðast að meðaltali á hverju sumri um 3,800 urriðar. Flestir frekar smáir en kröftugir. Stærri fiskar leynast innan um eins og gefur að skilja. Alltaf gengur eitthvað af laxi upp í ána og er meðalveiði á laxi í kringum þrjátíu fiskar á sumri.

• Blogga um frétt

Seinustu hundraðkallar sumarsins