Matur | mbl | 21.6.2018 | 14:02

Grillað lamb með sesam- og appelsínumarineringu

Grilluð lambasteik með sesam- og appelsínumarineringu. mbl/Arnþór Birkisson

Það verður seint hægt að fá nóg af góðu kjöti þótt að úti sé skelfingarveður um nánast allt land. En við látum það ekki á okkur fá enda löngu vitað að flest grill eru vatnsheld og við værum ekki Íslendingar nema við grilluðum í öllum veðrum.

Hér gefur að líta enn eina snilldina frá Hafliða Helgasyni, matreiðslumeistara en hér hefur hann búið til sesam- og appelsínumarineringu sem er vandræðalega góð og gerir mikið fyrir kjötið.

Grilluð lambasteik með sesam- og appelsínumarineringu

2 pk. lambasteikur, mínútusteikur 200 gr hver pakki
2 msk. sesam olía
1 msk. sesamfræ, ristuð
1 appelsína, börkur og safi
1 msk. ostrusósa
1 romaine salathaus
½ appelsína
3 msk chili olía

Aðferð:

Blandið kjöti ásamt, sesamolíu, sesam fræjum, appelsínuberki, appelsínusafa og ostrusósu og marinerið í að minnsta kosti 10 mínútur. Grillið eða steikið í 2 mínútur hvora hlið.

Skerið romaine langsum, penslið með chili olíu og grillið í u.þ.b. 1 mínútur á hvorri hlið á meðalhita. Skerið appelsínu í báta, penslið með olíu og grillið í 2 mínútur á meðalhita.