Þessi uppskrift fær undirritaða til að fá vatn í munninn og gott betur. Bragðsamsetningarnar hér eru svo skemmtilegar að ég myndi klárlega skilgreina þessa uppskrift sem fullkominn lokapunkt á góðum degi.
Það er engin önnur en Svava Gunnars á Ljúfmeti & lekkerheit sem á heiðurinn að þessari snilld.
Taílenskar kjúklinganúðlur – uppskrift fyrir 3-4
- 2 kjúklingabringur
- 6 dl vatn
- 1,5 kjúklingateningar
- 2 msk. fiskisósa
- 1,5 msk. sykur
- 1 tsk. chilliflögur
- 1 lime, fínrífið hýðið (passið að taka bara græna hlutann) og safinn úr helmingnum
- 50 g ferskt engifer, rifið
- 200 ml kókosmjólk
- 1 hvítlauksrif
- 100 g glass noodles
- 1/2 dós bambus, skolið vel og skerið í aðeins minni bita
Aðferð:
- Setjið vatn, kjúklingakraft, fiskisósu, sykur, chilliflögur, lime (hýðið og safann) og rifið engifer í pott og látið suðuna koma upp.
- Skerið hvora bringu í tvennt eftir þeim endilöngum og leggið í pottinn. Látið sjóða án loks í um 40 mínútur, eða þar til kjúklingakjötið nánast dettur í sundur og vökvinn hefur minnkað til muna.
- Takið kjúklinginn úr pottinum og rífið hann í sundur með tveim göfflum.
- Bætið kókosmjólk og hvítlauk út í soðið sem var eftir í pottinum og látið suðuna koma upp.
- Takið pottinn af hitanum og leggið núðlurnar í hann. Látið þær liggja í nokkrar mínútur eða þar til þær hafa tekið mestu sósuna í sig.
- Klippið núðlurnar aðeins niður í pottinum með skærum. Endið á að hræra kjúklingnum og bambusnum út í.
- Berið fram með hökkuðum salthnetum og sojasósu.
- - -
Fylgstu með Matarvefnum á Instagram og Facebook. Endalaus ævintýri, hugmyndir, skemmtilegir leikir og allt það heitasta heita...
mbl.is/Svava Gunnarsdóttir