Hér bjóðum við upp á eina þá bestu „fish and chips“-uppskrift sem þú munt prófa. Þessi frábæri réttur er sívinsæll bæði hjá börnum og fullorðnum, enda ekki að ástæðulausu.
Uppáhalds „fish and chips“-uppskriftin
Deig:
- 200 g hveiti
- ½ tsk. lyftiduft
- Salt og pipar
- 2¾ dl bjór
Djúpsteiktur þorskur:
- 500 g þorskur
- ½ dl hveiti
- Olía til steikingar
Franskar:
- 4 bökunarkartöflur
- ½ msk. ólífuolía
- 1½ tsk. salt
- 1 tsk. þurrkað rósmarín
Baunapuré:
- 250 g frosnar baunir
- 1 stórt hvítlauksrif
- 1 msk. skyr
- 1 tsk. sítrónusafi
- Salt og pipar
Annað:
- 1 tsk. sjávarsalt
- 50 g salat
- 1 sítróna
Aðferð:
Deig:
- Blandið hveiti, lyftidufti, salti og pipar saman í skál. Pískið bjórinn út í með pískara þar til deigið er orðið slétt og fínt. Látið hvíla í skál í 1 tíma við stofuhita.
Djúpsteiktur þorskur:
- Skerið þorskstykkin í munnbita. Hellið hveiti í skál og veltið þorsknum upp úr.
- Hellið olíu í stóran pott og hitið. Þú getur stungið með trépinna ofan í pottinn til að athuga hvort olían sé orðin nógu heit, en þá „frussast“ hún í kringum pinnann ef hún er tilbúin.
- Leggið þorskbitana varlega ofan í og ekki of marga í einu. Steikið í 5-6 mínútur þar til gylltir og gegnumsteiktir.
- Leggið á eldhúspappír og leyfið fitunni að leka af.
Franskar:
- Skrælið kartöflurnar og skerið svo í langar ræmur. Leggið kartöfluræmurnar í skál með ísköldu vatni í 30 mínútur. Þurrkið þær vel með hreinu viskastykki.
- Hitið ofninn í 200°. Veltið kartöflunum upp úr olíu, salti og rósmarín og dreifið úr á bökunarplötu á bökunarpappír, þannig að þær snerti ekki hver aðra.
- Bakið í ofni í 40-45 mínútur þar til gylltar og stökkar. Munið að velta þeim aðeins á leiðinni.
Baunapuré:
- Leggið frosnu baunirnar í skál og hellið sjóðandi heitu vatni yfir. Látið standa í 2 mínútur þar til þær eru þiðnaðar í gegn. Sigtið þá vatnið frá og maukið þær með töfrasprota.
- Hrærið saman við pressaðan hvítlauk og skyr og smakkið til með sítrónusafa, salti og pipar.
Annað:
- Berið steiktan fiskinn fram með frönskum kartöflum, baunapuré, salati og sítrónubátum. Stráið sjávarsalti yfir fiskinn og frönskurnar.