Confitandalæri með geggjuðu meðlæti

Kristinn Magnússon
Andalæri eru alveg einstaklega bragðgóð og henta vel til allra veisluhalda.

Upp­skrift­in kem­ur úr Hátíðarmat­ar­blaðinu okk­ar sem unnið var í sam­starfi við Hag­kaup og hægt er að nálg­ast HÉR.

Confitandalæri
2 pakkar andalæri

Andalærin koma tilbúin í vakúmpoka, hægelduð í sinni eigin fitu.

Gott er að láta lærin liggja í heitu vatni í 15-20 mínútur svo auðveldara sé að losa þau heil úr pokanum og þau eru orðin nokkuð heit í gegn.

Þá eru þau einfaldlega þerruð lítillega, söltuð og steikt á pönnu, fyrst með skinnhliðina niður, en það verður að fara varlega þar sem fitan getur verið að spýtast í allar áttir.

Steikt þar til skinnið er stökkt og þá snúið við og steikt örlítið á hinni hliðinni.

Sveppa-risotto

  • 300 g sveppir
  • 150 g kastaníusveppir
  • 1 stk. laukur
  • 4 stk. hvítlauksgeirar
  • 4 greinar timjan
  • 40 g smjör
  • 400 g arborio-hrísgrjón
  • 2 ½ dl hvítvín
  • 1 stk. sítróna – zest og safi
  • 1 – 1 ½ l soðið vatn
  • 2 msk. andakraftur
  • 1 ½ dl parmesanostur rifinn

Sveppirnir skornir í sneiðar, steiktir á pönnu með smá af smjörinu, salti og pipar, settir til hliðar.

Laukur og hvítlaukur skorinn smátt niður, timjanið pillað af greininni, svitað í potti með smjörinu þar til laukurinn er orðinn glær, ekki brúna hann.

Þá er grjónunum bætt út á og hrært vel í pottinum í um það bil 2 mínútur og þá er hvítvíninu hellt út á og látið sjóða vel niður.

Í öðrum potti er vatnið og andakrafturinn hitað upp saman.

Þegar hvítvínið hefur soðið vel niður er byrjað að ausa andasoðinu út á grjónin, gott er að setja bara eina ausu í einu og hræra vel í á milli og leyfa grjónunum að draga í sig soðið.

Í lokin þegar soðið er allt komið út í og grjónin orðin soðin er steiktu sveppunum, sítrónu-zestinu, safanum og parmesanostinum hrært saman við og smakkað til með salti.

Hvítkálssalatið hennar mömmu

  • ½ haus hvítkál
  • 1 lítil dós ananaskurl
  • ½ l þeyttur rjómi
  • 5-6 msk. mayo

Hvítkálið skorið eða rifið niður smátt, safinn sigtaður vel af ananaskurlinu.

Þeytta rjómanum og mayonesinu blandað saman og hrært út í hvítkálið og ananasinn.

Geymist í kæli í 2 – 3 klukkutíma áður en borðað.

Öðruvísi jólaeplasalat

  • 4 stk. græn epli
  • 2 stk. sellerístönglar
  • 1 dl þurrkaðar apríkósur
  • 1 dl vínrauð vínber
  • 1 dl pekan-hnetur
  • 3 dl súrmjólk
  • 1 dl Egils appelsínuþykkni
  • 2 dl rjómi

Byrjað er á því að þeyta rjómann og honum síðan blandað út í súrmjólkina og appelsínuþykknið, þá er sósan á salatið klár.

Eplin og vínberin skorin í meðalstóra bita, selleríið, apríkósurnar og hneturnar skornar smátt.

Síðan er öllu einfaldlega blandað saman.

Kristinn Magnússon
Kristinn Magnússon
Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.990 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »