20-40 ferðir falla niður

Allt nema nauðsynlegir sjúkraflutningar falla niður í verkfallsaðgerðum landssamband slökkviliðs- og sjúkraflutningamanna. Jón Viðar Matthíasson, slökkviliðsstjóri Reykjavíkur, segir til viðbótar bætast við yfirvinnubann.

„Það þýðir í raun og veru að menn sinna nú ekki þeim verkefnum sem að öllu jöfnu eru unnin í yfirvinnu. Slík verkefni hjá okkur eru t.d. utanbæjarflutningar, þegar við flytjum sjúkling frá einhverri stofnun á höfuðborgarsvæðinu út fyrir okkar svæði. Þetta getur skapað óþægindi fyrir sjúkrahúsin, þ.e. inn kemur sjúklingur sem þau sitja uppi með,“ segir Jón Viðar í samtali við mbl.is.

 Almennir sjúkraflutningar falla því niður en með þeim eru sjúklingar fluttir á milli sjúkrastofnana. „Álagið á þeim er mun meira á dagvöktum á virkum dögum. Þetta eru um 70-75% af flutningamassa okkar. Flutningafjöldinn hjá okkur a tólf tímum eru að meðaltali 50-70 ferðir. Þetta eru u.þ.b. 20-40 ferðir á dag sem leggjast af,“ segir Jón Viðar.

Dagbjört Þyrí Þorvarðardóttir, tímabundinn innlagningastjóri Landspítalans, segir töluverða flutninga á milli húsa daglega. Aðspurð segir hún mögulegt að sjúklingar gætu nú safnast á deildum sem skapar óþægindi fyrir starfsmenn og sjúklinga.

 „Ef það kemur til þess að við þurfum flutning sem við teljum nauðsynlegan þá er það tekið fyrir á fundi,“ segir Dagbjört Þyrí sem kveður verkfallið þó hafa gengið nokkuð hnökralaust síðast.

„Við áttum gott samstarf við slökkviliðið og eins vorum við bara heppin með þann dag.“