Nú eru margir sem vilja verða betri á samfélagsmiðlum og þurfa jafnvel á því að halda vegna vinnunnar. Hvað mælir þú með að þetta fólk tileinki sér?

„Á netinu þurfum við að hugsa um okkur sem vörumerki. Í grunninn snúast vörumerki um allar þær hugmyndir sem fólk hefur um okkur en vörumerki eru eingöngu til í huganum. Á samfélagsmiðlum getum við auðveldlega fylgst með fólki og þannig, meðvitað eða ómeðvitað, myndað okkur skoðun á því. Það sem fólk sér okkur skrifa og gera hefur mikil áhrif á hugmyndir fólks um okkur. Við þurfum því að hafa í huga að eitthvað sem við gerum eða segjum með nánum vinum eða fjölskyldu á stundum ekkert erindi á netið, frekar en á kaffistofunni í vinnunni eða á öðrum opinberum stað. Þegar við erum að selja þjónustu eða sækja um vinnu eru netmiðlar ein af leiðunum sem mögulegir mótaðilar styðjast við til að kynna sér okkur. Það getur því haft mikil áhrif á tækifæri okkar á vinnumarkaði að passa vel upp á það hvernig við birtumst öðrum þar,“ segir Guðmundur Arnar.

Hvað kennir þú fólki á þínum námskeiðum?

„Markaðsakademían er með fjölbreytta flóru af námskeiðum. Til dæmis um stjórnun markaðsstarfs, auglýsingakerfi Facebook og Instagram, tekjustýringu og sölu og þjónustu. Ég kenni sjálfur Ofurþjónustunámskeið og Stjórnun markaðsstarfs. Á báðum námskeiðum er þátttakendum hjálpað á hagnýtan hátt að ná mun meiri árangri í sínum störfum. Það voru hátt í 1.000 þátttakendur á námskeiðunum okkar árið 2019 og hafa þátttakendur náð frábærum árangri í framhaldi. Markaðsakademían hefur svo í auknum mæli verið að klæðskerasníða nám, námskeið og fyrirlestra fyrir fyrirtæki og þá sérstaklega fjarnám. Þá geta fyrirtæki verið að mennta nýtt og eldra starfsfólk hvar og hvenær sem er, og jafnvel með prófi til að tryggja skilning. Það hefur hentað mjög mörgum fyrirtækjum að útvista fræðslu og þjálfun á þennan hátt. 23. mars á næsta ári er svo stór dagur hjá okkur. Þá mun Disney Institute koma til Íslands og vera með fyrirlestur um það hvernig Disney býr til sína þjónustugaldra ásamt því að kenna okkur hvernig öll fyrirtæki geta tileinkað sér Disney-trixin. Á ráðstefnunni eru einnig stjórnendur frá Toyota, Hjallastefnunni, Bláa lóninu, 66°Norður og Hreyfingu með erindi um hvernig þau hafa náð árangri með þjónustu.“

Hvernig er markaðsheimurinn að breytast?

„Þegar ég starfaði hjá Icelandair fyrir mörgum árum átti að fara að kynna nýjung hjá fyrirtækinu. Yfirmenn mismunandi sölusvæða komu saman á fundi vegna þessa og það var farinn hringur þar sem allir fóru yfir hvernig ætti að kynna þessa nýjung í mismunandi löndum. Þegar kom að Íslandi sagði svæðisstjórinn: „Ég hugsa að við kaupum bara 1-2 heilsíður í Morgunblaðinu“ og salurinn hló, en á þeim tíma var það í raun nóg til að ná til nánast allra. Í dag er umhverfið orðið flóknara og því þurfa flestir fleiri miðla og aðferðir. Í grunninn hefur markaðsstarf samt kannski ekki breyst mikið. Við þurfum að vita hvað markhópurinn okkar vill, skapa boð sem uppfyllir þær þarfir og afhenda svo virðið á einhvern stöðugan hátt. Svo grunnurinn í því sem við kennum: að skilja fólk og markaði ásamt stefnumótun hefur kannski ekki breyst mikið en við höfum í dag fleiri tæki og tól fyrir aðgerðirnar sem við notum til að ná markmiðunum.“

Hvað þarf fólk að tileinka sér til þess að verða ekki undir?

„Við lifum á tímum þar sem við þurfum sífellt að vera að mennta okkur. Þegar háskólanámi lýkur tekur við stöðug endurmenntun. Heimurinn er að breytast hratt og störfin með. Til að tryggja framtíðarmöguleika okkar á vinnumarkaði hefur því aldrei verið mikilvægara að við séum sífellt að læra. Þetta á ekki síður við markaðsstörf en önnur. Eitt sem einkennir sérstaklega markaðsfræðsluna er magnið af, í raun, vitleysu sem má finna á netinu og annars staðar. Það er alltof mikið skrifað og miðlað af vanþekkingu sem hefur áhrif á stjórnendur með oft afar neikvæðum og kostnaðarsömum afleiðingum. Við þurfum því að passa hvaðan þekkingin kemur sem við látum hafa áhrif á okkar störf.“

mbl.is/Unsplash

Nú nota sumir Facebook sem öndunarvél. Hefur þú heyrt að það hafi hamlað fólki að fá vinnu að hafa látið eins og bjánar á netinu?

„Ég veit um mörg dæmi um slíkt. Einnig dæmi um að fólk hafi fengið áminningu í starfi vegna ummæla og mynda. Ef allt það sem fólk sér, heyrir og les um okkur hefur áhrif, þá þurfum við að passa að við séum á öllum stöðum að endurspegla þá ímynd sem við viljum standa fyrir, rétt eins og fyrirtæki þurfa að gera. Ímynd fyrirtækja getur svo orðið fyrir áhrifum af ímynd starfsmanna.“

Hvert verður næsta stóra mál í þessum rafræna heimi?

„Við eigum eftir að sjá gervigreind leika stærra hlutverk í enn fleiri kerfum sem hjálpa okkur að ná árangri. Meiri sjálfvirkni mun fækka starfsfólki við störf sem skapa lítið virði. Mannleg samskipti verða þó enn mikilvægari en fjöldi þeirra minnkar. Þó að mest af samskiptum viðskiptavina við banka og í matvöruverslunum færist sífellt meira yfir í öpp og tæki fara þau samskipti sem eftir standa að hafa meiri áhrif á ímynd. Mikilvægi vörumerkja mun jafnframt aukast með sífellt fleiri kostum. Þegar fólk verslar í Bónus gengur það yfirleitt framhjá nánast öllum vörum í hillum. Allar hafa því tækifæri til að fá athygli frá okkur. Þegar fólk gúglar eða leitar í vefverslun koma aðeins örfáar leitarniðurstöður upp í einu. Hvaða síðu fólk fer inn á, tengil fólk smellir á eða orð fólk gúglar stjórnast því mikið af vörumerkjunum sem við könnumst við eða þeim sem koma fyrst upp í hugann. Mikilvægasta leitarvélin er því enn sem áður sú sem er í huga okkar!“