Anna Dóra Guðmundsdóttir léttist um sjö kíló á meðan á átakinu, 10 árum yngri á 10 vikum, stóð. Hún segir að það hafi verið mun meira en hún þorði að vona og segist alls ekki ætla að léttast meira. 

Þegar Anna Dóra byrjaði í átakinu var mittismálið 86 sm en nú er það 70 sm. Hún hefur þó ekki bara lést, styrkst og rýrnað heldur hefur húðkláði sem hún var með minnkað til muna. Á dögunum bloggaði Anna Dóra um það albesta. 

„En rúsínan í pylsuendanum er mýkri og áferðarfallegri húð.  Það ótrúlega hefur gerst að húð mín sem hefur verið óhemju þurr og viðkvæm í áratugi er núna orðin mýkri og teygjanlegri.  Fótleggirnir sem oft voru hvítflagnandi af þurrki eru núna mjúkir og húðin gljáir.  Appelsínuhúð (cellulite) hefur líka hrjáð mig (eins og margar konur).  Upphandleggirnir sem voru orðnir heldur kornóttir af appelsínuhúð eru nánast lausir við þann fjanda.  Áferðin á rassi og lærum hefur líka lagast mikið þó baráttan haldi áfram á þeim vígstöðvum - slagur sem lýkur líklega seint eða aldrei.“

Anna Dóra er glæsileg á nýju myndunum í baðfötum frá Selenu og hún var förðuð með MAC snyrtivörum.