Myndlistarmaðurinn Hulda Vilhjálmsdóttir opnaði sýningu á verkum sínum hjá Listval á dögunum. Galleríið flutti á dögunum á Hverfisgötu og var sýning Huldu fyrsta sýniningin sem haldin er á nýjum stað. Listval hefur verið leiðandi í myndlistarráðgjöf fyrir einstaklinga og fyrirtæki undanfarin ár og þar hafa þekktir listamenn sýnt verk sín. 

Sýningin Huldu ber nafnið Ég er gegnsæ. Þar kannar hún gagnsæið með japanskri málaratækni og pappír í verkum þar sem gagnsæ tákn og myndir spretta fram. Í verkunum kafar hún ofan í sameiginlegan skynheim og tilfinningar og í þetta sinn beitir hún óhlutlægri, abstrakt nálgun. 

Allt frá útskrift hefur Hulda helgað sig málaralistinni og haldið fjölda sýninga bæði hér heima og erlendis. Hún er einna þekktust fyrir fígúratíf málverk þar sem manneskjan, tilfinningar og tilveran er hennar megin viðfangsefni.

Það var vel mætt á sýninguna. Á meðal gesta var Sigurjón Sighvatsson kvikmyndaframleiðandi, Davíð Másson fjárfestir, Bragi Kristjónsson bóksali og nýjasta parið í bænum Vigdís Jónsdóttir og Magnús Jóhannsson. Þar var líka myndlistarmaðurinn Aðalheiður Valgeirsdóttir og Erlendur Hjaltason, Sísí Ingólfsdóttir og Ragnhildur Ágústsdóttir myndlistarmaður.