Helga Hauksdóttir lögmaður býr ákaflega vel ásamt eiginmanni sínum, Geir Gestssyni og sonum þeirra tveimur sem eru 9 og 11 ára. Helga gerir fleira en að sinna lögmennsku. Nú er hún í framboði fyrir Framsóknarflokkinn í Kópavogi þar sem hún er í 2. sæti. Menntamál eru henni ofarlega í huga. Helga ólst upp á Bifröst í Norðurárdal eða þangað til hún var 8 ára þá flutti hún í Kópavog.
„Í dag bý ég í Fífuhvamminum í Kópavogi og við höfum búið hér í tæpan áratug. Ég ólst hérna rétt hjá og náði sem betur fer að draga Breiðhyltinginn minn hingað,“ segir Helga. Þegar hún er spurð að því hvernig heimilistýpa hún sé segist hún vera frekar afslöppuð þegar kemur að heimilinu.
„Ég og maðurinn minn tókum þá ákvörðun snemma að heimilishald ætti ekki að verða uppspretta stress eða ósættis. Ég reyni að hafa fínt í kringum mig en það tekst svona misjafnlega vel í dagsins önn. Það hjálpar að vera frekar með færri hluti en fleiri,“ segir hún.
Þurftir þú að breyta miklu áður en þú fluttir inn?
„Við breyttum engu áður en við fluttum inn en núna 10 árum seinna erum við búin að gjörbreyta húsinu. Við fórum okkur hægt og fengum fyrst tilfinningu fyrir húsinu. Við höfum svo verið að gera það upp smám saman. Fyrst neðri hæðina og svo efri hæðina. Það er allt öðruvísi núna en þegar við keyptum. Þar sem áður var inngangur er nú barnaherbergi, eldhúsið er þar sem hjónaherbergið var áður o.s.frv. Við höfðum skipulagið þannig að á efri hæð er stofa, eldhús og gestainngangur en á neðri hæðinni eru svefnherbergin.“
Hver er uppáhaldsstaðurinn á heimilinu?
„Eldhúsið er í uppáhaldi. Efri hæðin hjá okkur mjög opin, það eru gluggar í allar áttir, þannig við fáum mikla birtu. Þarna sér maður sólarupprásina og sólsetrið, svona þegar sólin lætur sjá sig, og garðinn og fuglalífið. Og svo getur maður borðað,“ segir hún.
Fékkstu arktitekt til að hanna heimilið?
„Já, Ragnheiður Sverrisdóttir innanhúsarkitekt hefur verið okkar stoð og stytta í gegnum allt ferlið. Þegar við keyptum húsið þá ákváðum við að hérna vildum við búa næstu áratugina. Við erum hvorugt mjög handlagin og vildum helst bara standa í þessu einu sinni. Það skipti okkur máli að breytingarnar myndu henta fjölskyldunni vel, vera praktískar og klassískar, en ekki detta úr tísku eftir örfá ár. Það er akkúrat það sem við sáum í hönnuninni hjá Ragnheiði, þannig hún á mestan heiðurinn að breytingunum,“ segir Helga.
Aðspurð að því hvernig lífi hún lifi segist Helga vera mikil fjölskyldumanneskja.
„Ég lifi dæmigerðu fjölskyldulífi, vinn vinnuna mína, sinni fjölskyldunni og svo fer auðvitað mikill tími í kosningabaráttu þessa dagana.“
Ertu heimakær?
„Já, eiginlega einum of. Mér finnst fátt betra en að vera heima með fjölskyldunni.“
Ertu þessi týpa sem ert alltaf að breyta eða ertu fastheldin þegar kemur að heimilinu?
„Ég breyti frekar lítið. Ég er helst í því að bæta við blómum þessa dagana og reyna svo að drepa þau ekki jafnóðum,“ segir Helga.