Skilaboðin sem berast nú úr herbúðum skipulagsdrottningarinnar Marie Kondo eru ekki laus við þversögn.
Hin japanska Kondo hlaut alheimsfrægð með þáttum sínum Tidying Up with Marie Kondo þar sem hún kenndi fólki að laga til og skipuleggja heima hjá sér. Þá hamraði hún á því að maður ætti að gefa eða henda því sem vekti ekki gleði hjá manni.
Kondo hefur verið boðberi hins naumhyggjulega lífstíls sem felur í sér að eiga aðeins minna af drasli. Nú hefur hún sett netið á hliðina með nýrri netverslun þar sem hún selur alls konar drasl, sérhannað af henni sjálfri.
„Öll þessi ár vildi Marie Kondo að við hentum dóti. Og núna vill hún að við kaupum dót úr nýju netversluninni hennar,“ skrifaði einn furðulostinn aðdáandi á Twitter.
Í nýju netversluninni hennar, KonMari.com, er hægt að kaupa hina ýmsu skrautmuni, eldhúsáhöld, skipulagsvörur og baðvörur. Stíllinn yfir vörunum er afskaplega naumhyggjulegur og fallegur.