Við Kleppsveg í Reykjavík stendur sérlega vel heppnuð 59 fm íbúð þar sem hugsað er út í hvert einasta smáatriði. Svo mikið er pælt í smáatriðum að sérstakt pláss er fyrir ryksuguvélmenni undir rúmi.
Íbúðin stendur í húsi sem var byggt 1971 og hefur verið endurnýjuð mikið.
Í eldhúsinu er svört innrétting með svartri borðplötu, svörtum vaski og svörtum blöndunartækjum. Við hlið innréttingarinnar er frístandandi ísskápur. Fyrir ofan innréttinguna er bleikur flísalagður veggur sem setur mikinn svip á rýmið. Einnig er sniðugt að sjá útfærslu á eyju sem er nett, en þó stúkar hún af stofuna að hluta til.
Íbúðin var hönnuð af HAF STUDIO og setur niðurlímt parket svip sinn á rýmið ásamt glerveggnum sem stúkar af svefnherbergi.
Þegar inn á baðherbergi er komið tekur við sannkölluð Terasso-veisla þar sem þessi tegund af flísum fær að njóta sín.