Agnes Björgvinsdóttir, förðunarfræðingur og eigandi Blank Reykjavík, og kærasti hennar, Kristjan Marko Stosic, hafa sett glæsilega íbúð sína við Úlfarsbraut í Úlfarsárdal á sölu. Íbúðin er skráð 111 fm að stærð og er staðsett á jarðhæð í nýlegu fjölbýlishúsi.
Agnes hefur verið að gera það gott í förðunarheiminum og heldur úti vinsælum Instagram-reikningi, en þar hefur hún leyft fylgjendum sínum að fylgjast með framkvæmdum í íbúðinni og óhætt að segja að útkoman sé glæsileg.
Eldhús, borðstofa og setustofa eru samliggjandi í björtu alrými, en þar að auki eru þrjú svefnherbergi og eitt baðherbergi í íbúðinni. Mjúkir tónar eru áberandi í íbúðinni þar sem mikið er af fallegum húsmunum. Stofan er hlýleg og björt, en þar má meðal annars sjá flott ljós frá Dimm, spegil frá FERM og sófaborð frá NORR11.
Í eldhúsinu er svört mött innrétting sem gefur alrýminu skemmtilegan karakter, en nýverið var fallegum svörtum quartz stein komið fyrir ofan á eldhúsinnréttingunni sem gefur innréttingunni mikinn glæsibrag. Frá borðstofunni er útgengt á rúmgóðar suðursvalir með dásamlegu útsýni yfir náttúruna í kring.