Smartland Mörtu Maríu | Jól | Morgunblaðið | 2.12.2021 | 18:00 | Uppfært 6.12.2021 16:02

„Leigjendur eru duglegir að koma við og fylla á básana sína“

Guðríður Gunnlaugsdóttir stofnaði Barnaloppuna þann 12. maí árið 2018. Frá þeim tíma má áætla að búðin, sem selur notaðan barnafatnað og dót, hafi sparað yfir 20 þúsund tonn í losun koltvíoxíðs (CO2). mbl.is/Árni Sæberg

Guðríður Gunnlaugsdóttir framkvæmdastjóri hvetur alla til að muna eftir umhverfinu á jólunum. Hún segir úrvalið í Barnaloppunni mikið á jólunum og þar megi finna fallegar gjafir í jólapakkann.

„Við búum alltaf til jóladagatal með alls konar jólatengdum viðburðum í Barnaloppunni í desember. Þótt það sé erfitt að segja til um úrvalið á tilteknum tímapunkti í búðinni þá er von á fallegum fatnaði á börnin fyrir þá sem vilja styðja við hringrásarhagkerfið og kaupa það sem hefur verið keypt af öðrum áður,“ sagði Guðríður og útskýrir hvernig Barnaloppan virkar.

„Í búðinni er mikið vöruúrval þar sem finna má bæði fatnað og dót fyrir börn. Við erum með bása sem einstaklingar leigja út til að selja vörur sem þeir eiga og vilja koma áfram á aðra. Vöruúrvalið breytist frá degi til dags með nýjum leigjendum.“

Það eru að meðaltali 20 til 30 nýir leigjendur í Barnaloppunni á degi hverjum og samtals fjögur til fimm þúsund endurnýttar vörur sem hægt er að velja úr.

„Leigjendur eru duglegir að koma við og fylla á básana sína eða skipta út vörum og því er mikil endurnýjun í gangi frá degi til dags,“ segir Guðríður.

Allir eiga erindi í Barnaloppuna

Það er án efa spennandi að fylgjast með því hvað leynist í pokum þeirra sem eru að selja í Barnaloppunni.

„Eftir að við stækkuðum við okkur í upphafi þessa árs þá bættust við fleiri básar, í raun þriðjungi fleiri, svo vöruúrvalið er meira í ár. Við erum alveg að verða fullbókuð fyrir jólin og því vitum við að úrvalið verður svakalegt eins og vanalega í þeim 313 básum sem nú eru í búðinni. Það er líka gaman að sjá hvað leigjendur eru orðnir sjóaðir í að selja fyrir jólin og vita nákvæmlega hvað selst vel og útbúa oft alls kyns jólaþema í básunum. Í fyrra var áberandi mikið af leikföngum til sölu og voru jólasveinarnir duglegir að kíkja til okkar og finna alls kyns smádót. Við seldum einnig mikið af spari- og jólalegum fatnaði. Þetta er áhugaverð þróun og virkilega gaman að sjá hversu margir kaupa endurnýttar vörur og gjafir fyrir jólin.“

Hvernig myndir þú lýsa viðskiptavinum ykkar?

„Ég myndi segja að við værum með alla flóruna af viðskiptavinum. Okkar upplifun er sú að það séu allir til í að endurnýta og/eða spara pening, alveg sama hvaða titil viðkomandi hefur í þjóðfélaginu, hvort sem það er heimsfræg söngkona, einstæður faðir, amma, flóttamaður, unglingur eða hver sem er. Við foreldrar eigum það sameiginlegt að eiga börn sem vaxa hratt úr grasi og því frábær kostur að kaup allt á einu bretti fyrir börnin hjá okkur og endurnýta í leiðinni á skemmtilegan hátt.“

Engin skömm fólgin í að gefa notaða gjöf

Af hverju ætti barnafólk að koma til ykkar að versla um jólin?

„Ef við hugsum um hvert við stefnum í loftslags- og umhverfismálum þá er klárlega málið að koma til okkar og taka þannig beinan þátt í að sporna við þessari svakalegu neyslu sem fer fram sérstaklega yfir hátíðarnar. Jörðin er bókstaklega að fyllast af rusli og þar kemur að við getum ekki sent ruslið okkar úr landi til urðunar. Ég verð samt að segja að það er frábært að sjá hvað kauphegðun landsmanna hefur breyst síðustu ár og hvað endurnýting er orðin stór hluti af íslensku samfélagi.“

Allir sem versla og selja hjá Barnaloppunni eru að taka þátt í hringrásarhagkerfinu að hennar sögn.

„Því eru fyrirtæki eins og okkar gríðarlega mikilvæg. Í hvert skipti sem neytendur velja að kaupa notaða vöru draga þeir beint úr framleiðsluþörf á nýrri vöru og nýta þannig hráefni jarðarinnar betur.

Á hverju ári hefur stórlega bæst við verslun hjá okkur í kringum jólin og við vitum til þess að það er orðið mun algengara að gefa og þiggja notaðar gjafir og ekki bara um jólin heldur almennt. Viðskiptavinir okkar eru stoltir af því að gefa gjafir úr versluninni, sem er gaman að sjá. Fólk nýtir sér einnig umhverfisvæna innpökkunarborðið okkar.“

Fallegur rauður litur vinsæll á jólunum

Eruð þið með mikið af merkjavörum eða meira vörur í einföldum stíl fyrir börnin á jólunum?

„Við erum með mikið af alls konar merkjavöru hjá okkur allan ársins hring og merkjavaran hefur aukist með árunum. Það er alltaf gaman að sjá nokkur nöfn inni í flíkunum og það sjáum við mikið í þessum gæðavörum sem koma inn. Þannig vitum við að vörurnar eru notaðar mörgum sinnum.“

Hvað er í tísku ef marka má vörurnar ykkar núna?

„Ég myndi segja að það væru ljósir litatónar en svo yfir jólin dökkna litirnir í barnafötunum. Þá verða flíkur í rauðu, grænu og bláu meira áberandi.“

Ástæðu þess að Guðríður stofnaði Barnaloppuna má rekja til búsetu hennar erlendis.

„Við fjölskyldan bjuggum í Danmörku í tæp sjö ár og kynntumst þar „loppe“-mörkuðum í alls konar myndum. Okkur fannst fátt skemmtilegra en að kíkja á loppe og röltum oft endilanga Kaupmannahöfn í leit að flottum mörkuðum. Við kynnumst svo Barnaloppunni í Danmörku síðasta haustið okkar úti árið 2017. Við prófuðum að selja vörur þar í tvær vikur sem gekk mjög vel. Eitt kvöldið þegar við vorum að hjóla heim eftir að hafa tekið básinn okkar niður í Barnaloppunni í Valby spyr maðurinn minn hvort við ættum ekki bara að opna svona verslun heima á Íslandi. Barnaloppan var opnuð 12. maí 2018 með pomp og prakt. Fljótlega eftir sumarfrí varð fullbókað hjá okkur og þannig hefur eftirspurnin verið til dagsins í dag.“

Hafa sparað yfir 20.000 tonn í losun koltvíoxíðs (CO2)

Fataiðnaðurinn hefur mikil áhrif á heimsbyggðina og hefur samtal um ábyrgð iðnaðarins og hringrásarhagerfið átt sér stað víða.

„Það er mjög mikilvægt að við gefum hlutunum framhaldslíf og endurnýtum. Samkvæmt nýjustu rannsóknum eru 8% af heildarlosun koltvíoxíðs (CO2) á jörðinni tilkomin vegna textílneyslu og er hún því ein mest mengandi atvinnugrein á heimsvísu. Þetta er meiri losun en millilandaflug og sjóflutningar til samans. Það má því með sanni segja að endurnýting, betri nýting og endurvinnsla skipti gríðarlega miklu máli í stóra samhenginu. Margt smátt stuðlar að stórum breytingum. Við teljum einnig kauphegðun Íslendinga hafa breyst töluvert eftir að við opnuðum þar sem fleiri velja að kaupa notaðar vörur en áður.“

Áttu börn sjálf og hvernig klæðir þú þau upp á fyrir jólin?

„Já ég á tvær dætur, sem eru tólf og sjö ára. Við kaupum 99% af þeirra fatnaði í Barnaloppunni. Ég keypti nú nýverið jóladressið á þá yngri í Loppunni og svo fær sú eldri að velja sér eitthvert fallegt dress þar líka.

Annars finnst okkur jólanáttfötin best og því ekki síður mikilvægt að finna falleg náttföt á þær.“

Yngri dóttir Guðríðar hefur fengið jóladressið sitt í Barnaloppunni en sú eldri á eftir að velja sitt dress. Það verður úr nægu að velja. mbl.is/Árni Sæberg

Í lok ársins 2019 reiknuðu umhverfisverkfræðingar á vegum Eflu út sparnað á kolefnissporum við að versla í Barnaloppunni.

„Þessi rannsókn var byggð á tölfræðilegum upplýsingum á seldum vörum og niðurstaðan var sú að sparast hafa yfir 5.000 tonn af losun koltvísýringsígilda út í umhverfið. Það jafnast á við útblástur 2.500 bíla á einu ári. Þessar tölur jafngilda einnig fullum klæðnaði á 80 þúsund íslensk börn, miðað við átta flíkur og tvö leikföng á hvert barn. Raunhæft er að ætla að þessi tala hafi líklegast fjór- eða fimmfaldast síðan þá með meiri innkaupum og vakningu í samfélaginu. Í dag áætlum við að Barnaloppan hafi sparað yfir 20.000 tonn í losun koltvíoxíðs (CO2).“