Það var einstök stemning í Sky Lagoon þegar söngkonan Bríet hélt glæsilega tónleika til styrkar átakinu Gefðu fimmu. Helga Ólafsdóttir framkvæmdastjóri 1881 velgjörðarfélags, sem stendur að átakinu, var í skýjunum með kvöldið. 

„Stemningin var mögnuð. Sjónarspil sólsetursins speglaðist í Sky Lagoon og tók á móti tónleikagestur. Margeir hitaði upp og tónleikagestir nutu dekursins sem Sky Lagoon býður upp á ásamt svalandi drykkjum.

Þegar Bríet steig á svið var farið að rökkva sem skapaði notalega stemningu. Bríet söng hvern hittarann á fætur öðrum með sinni einstöku einlægni við undirspil Rubin Pollock og Þorleifs Gauks. Ég fékk gæsahúð og það er ekki hægt að hugsa sér flottari tónleikastað á Íslandi,“ segir Helga og bætir við: 

„Við sem stöndum að 1881 vel­gjörðarfé­lagi erum í skýjunum með viðbrögðin. Við viljum þakka öllum þeim sem lögðu söfnuninni lið ásamt þeim sem stóðu að þessum einstaka viðburði með okkur,“ segir hún.