Hallgrímur Helgason rithöfundur fagnaði útkomu bókar sinnar, Sextíu kíló af kjaftshöggum, á Skuggabaldri á fimmtudagskvöld. Það varð ekki þverfótað fyrir þekktu fólki sem er áberandi í þjóðfélaginu í boðinu. Á meðal gesta voru Dagur B. Eggertsson, Andri Snær Magnason, Páll Valsson, Herdís Þorgeirsdóttir og Guðmundur Andri Thorsson svo einhverjir séu nefndir. 

Sextíu kíló af kjaftshöggum er sjálfstætt framhald af bókinni Sextíu kíló af sólskini, sem hlaut mikið lof gagnrýnenda. 

Sagan hefst í Segulfirði árið 1906. Áfram vindur fram furðuríku ferðalagi Íslendinga út úr myrkum torfgöngum inn í raflýstar stofur. Lesandinn er hrifinn með í dans á síldarpalli, í ólgandi takti sem dunar í huganum að lestri loknum því enn á ný hefur Hallgrími tekist að kveða dýran óð úr örlögum fátæks fólks við ysta haf.