Það voru einstaklega margir prúðbúnir í Hörpu þegar óperan Madama Butterfly var frumsýnd í Eldborg á vegum Íslensku óperunnar.

Madama Butterfly eftir Puccini þykir ein fallegasta ópera sem samin hefur verið. Hún fjallar um ódauðlega ást, drauminn um betra líf og óbærilegan missi. Hljómsveitarstjórinn Levente Török þykir einn áhugaverðasti ungi hljómsveitarstjórinn í óperuheiminum í dag. Leikstjórinn sem einnig hannar leikmyndina er Michiel Dijkema en hann hefur sett upp fjölmargar óperusýningar víða um heim og hvarvetna hlotið frábærar viðtökur áhorfenda og lofsamlega dóma. María Th. Ólafsdóttir hannar búningana og Þórður Orri Pétursson hannar lýsinguna.

Eins og sjá má á myndum Aldísar Pálsdóttur var hátíðleikinn allsráðandi. Á meðal gesta var Alma Möller landlæknir sem klæddi sig upp á og skartaði kjól frá íslenska tískuhúsinu Sif Benedicta. Hún var einmitt ein af fáum sem fengu þjóðina til að gleyma stund og stað og almennum leiðindum þegar hún mætti í slaufuskyrtunni á upplýsingafundi þríeykisins.