Listamaðurinn og rithöfundurinn, Hallgrímur Helgason, opnaði sýninguna Hópmyndir af sjálfi í Listamönnum gallerí á laugardaginn.

Á sýningunni sýnir Hallgrímur málverk og teikningar sem unnar voru á árunum 2021 og 2022. Öll verkin eru einskonar sjálfsmyndir en þó ekki hefðbundin „self portrait“ heldur sýna verkin mismunandi karaktera sem búa innra með listamanninum. 

„Já, ég er búinn að vera að sukka í sjálfum mér síðasta árið og lengur. Ég byrja með auðan striga og læt vaða, spenntur að sjá hvað birtist og reyni að ritskoða mig ekki neitt. Hér er það höndin sem ræður för, höndin sem heldur á penslinum. Ég hugsa bara með mér að fyrst þetta er liðið sem kemur úr honum hlýtur það að vera einhver hluti af mér,“ segir Hallgrímur.