El­ín­rós Lín­dal, ein­stak­lings- og fjöl­skylduráðgjafi, svar­ar spurn­ing­um les­enda Smart­lands. Hér spyr karlmaður hvers vegna hann dreymi konuna sína stanslaust að halda framhjá, stundum með mönnum sem hann þekkir.  

Sæl.

Mig hefur verið að dreyma mjög mikið upp á síðkastið og oftast dreymir mig það að konan mín sé að halda framhjá mér og stundum með einhverjum sem ég þekki. Ég treysti konunni minni fullkomlega og veit að hún myndi aldrei halda framhjá. En það er farið að aukast að mig dreymi þetta og draumarnir verða sífellt grafískri. Í fyrstu fannst henni þetta hálffyndið en ekki lengur. Núna vill hún túlka þetta þannig að ég hafi áhuga á því að stíga út fyrir hjónabandið, en ég hef engan áhuga á því. Reyndar hefur kona haldið framhjá mér áður og kannski er þetta bara einhver ótti undir niðri.

Hvað lest þú út úr þessu?

El­ín­rós Lín­dal er NLP-ein­stak­lings- og fjöl­skylduráðgjafi með grunn­próf í sál­fræði og fjöl­miðla­fræði. MBA frá Há­skól­an­um í Reykja­vík. Hún sér­hæf­ir sig í meðvirkni og fíkni­sjúk­dóm­um. mbl.is/Eggert

Hæ hæ.

Takk fyrir að senda mér bréfið. Ég er þakklát fyrir að fá að gefa þér ráð í þessari stöðu. Ég les ýmislegt út úr bréfinu og skal útskýra betur fyrir þér hvað ég sé.

Verkefnin okkar leita ýmissa leiða til að komast upp á yfirborðið. Draumar eru ein leið og þess vegna er ég sammála þér um að einhverju hefur þú þrýst niður og ekki skoðað. Mér sýnist þú með undirliggjandi ótta sem er að koma upp. 

Auðvitað, ef eitthvað hefur gerst einu sinni, af hverju ætti það ekki að gerast aftur?

Framhjáhald er alvarlegt trúnaðarbrot sem gerist vanalega ekki þegar einstaklingar eru algjörlega heiðarlegir hvor við annan í sambandi. Ástæður framhjáhalds geta verið margs konar. Ég er alls ekki að dæma konuna sem hélt fram hjá þér. Vil taka það fram.

Ást er ákvörðun og vanalega velur maður að setja ást í samband við einstakling sem er mjög góður vinur manns og maður hefur löngun til að fara í gegnum lífsins ólgusjó með. Í góðum hjónaböndum koma upp alls konar mál, sem eru að mínu mati oft og tíðum þessi verkefni sem við þurfum að leysa saman til að verða heil að nýju. 

Nú veit ég ekki hvernig þið leystuð málið með framhjáhaldið, en ég get fullvissað þig um að ef þið hafið gert það þannig að þið komuð sterkari út sem par ættu draumarnir ekki að vera að koma upp hjá þér. Það er eitthvað ennþá óleyst þarna undir niðri. Það gæti vel verið að þó þú sért kominn í nýtt samband þurfi konan þín í þessu sambandi að fara með þér í þessa vinnu.

Það tekur mörg ár að byggja upp traust og trúnað og eitt atvik getur eyðilagt margra ára vinnu ef ekki er skoðað hvað liggur að baki og gerður nýr samningur inn í framtíðina. 

Ég hvet þig til að leggja af stað með konunni þinni í vegferð þar sem þið notið það sem þið eruð að fara í gegnum til að leysa málin og verða sterkari saman.

Ég les einnig einlægni og góð tjáskipti ykkar á milli út úr bréfinu. Það er jákvætt. Haltu áfram að vera opinn með þínar tilfinningar og drauma. Þú hefur ekkert að fela. Þetta er þitt líf, þín vegferð og ég er stolt af því að fá bréf frá karlmanni með tilfinningar sem hefur þor og hugrekki til að staldra við og langa til að vita meira. 

Að lokum langar mig að benda á eina góða leið til að auka hamingjuna í sambandinu sem þú ert í núna. Ef þú ræktar þig og vinnur daglega að því að verða besta útgáfan af þér muntu hafa betri möguleika að vera í mjög góðu sambandi við aðra. Góður maki er alltaf einungis viðbót við annars gott líf. Hann á ekki að vera lífið sjálft. Þannig getur maður sleppt því sem er ekki þess virði að halda og valið það sem er best fyrir mann hverju sinni. Þegar þú veist að þú ert algjörlega sá sem þú ert skapaður til að vera þá verðurðu öruggari með allt í kringum þig og getur valið konuna þína, elskað hana og verið góður við hana daglega. Ef hins vegar eitthvað kæmi upp óvænt tengt núverandi konu þinni í framtíðinni gætirðu stigið eitt skref út úr aðstæðunum. Horft á hvað hefur gerst með opnum hug og kærleika. Ákveðið að taka hlutunum ekki persónulega og séð svo bara hvað hentar þér inn í framtíðina. 

Gangi þér vel. 

Kærar - Elínrós.

Ligg­ur þér eitt­hvað á hjarta? Þú get­ur sent El­ín­rós póst HÉR. 

Tengdar fréttir

Elínrós Líndal einstaklings-og fjölskylduráðgjafi

Keypti hús með manni sem er ruddalegur við dæturnar - hvað er til ráða?

• Hvar eru allir mennirnir sem eru um 60 ára?
• Hann gefur mér ekki einu sinni afmælisgjöf
• Kærastan hélt framhjá með besta vini - hvað er til ráða?
• Kærastan gargar í hvert skipti sem hún biður hann um eitthvað

» Fleiri tengdar fréttir

• Blogga um frétt