Kynlíf gagnkynhneigðra para, eða samfarir réttara sagt, tekur ekki eins langan tíma og margir halda. Lengdin hefur í raun ekkert með gæði kynlífs að gera en í gegnum tíðina hafa verið gerðar rannsóknir á því hvað samfarir taka langan tíma.
Læknirinn Rena Malik tók sem dæmi rannsókn á samförum sem var gerð á 500 pörum um allan heim að því er fram kemur á vef Women's Health. Pörin notuðu skeiðklukku til þess að mæla tímann. Þau mældu ekki allt kynlífið heldur frá því að samfarir hófust þangað til karlmaðurinn fékk sáðlát.
Karlmenn töldu að hinn fullkomni tími væri 16 mínútur en í rauninni er meðaltíminn mun styttri. Í rannsókninni kom fram að meðaltími samfara er 5,7 mínútur. Lengd samfara var mismunandi eftir löndum. Í Tyrklandi var meðaltími aðeins 4,4 mínútur en í Bretlandi 10 mínútur.
Rannsóknin var nokkuð einföld og er stærsti gallinn sá að ekki var tekið tillit til fullnægingar kvenna. Í rannsókn sem meira en fjögur þúsund konur tóku þátt í kom í ljós að það tók konur um 25 mínútur að fá fullnægingu. Kynlíf er að sjálfsögðu persónubundið og mikilvægast er að allir séu ánægðir.