Svona fagnaði Ásdís Rán 40 árunum

Ásdís Rán Gunnarsdóttir hélt upp á fertugsafmæli sitt í Sofíu í Búlgaríu á dögunum. Öllu var tjaldað til svo veislan yrði sem best. Um fjörutíu manns fögnuðu með henni. 

„Ég ákvað að halda upp á stórafmælið í Sofíu þar sem ég var með krakkana í fríi í sumar og var svo heppin að ná að plata nokkra fjölskyldumeðlimi til að fljúga yfir og fagna með mér í sólinni,“ segir Ásdís Rán.

Afmælið stóð í raun yfir í viku og fór Ásdís Rán með fjölskyldu sína víðs vegar um borgina og fjallahéruðin í veislur og útsýnisferðir. 

„Afmælisvikan endaði svo með „Glamorous“ kokteil-partíi í Sofíu sem Evgeni vinur minn hóstaði með stæl,“ segir hún. 

-Hvað bauðstu upp á?

„Ég var með gullkampavín ásamt hinum ýmsu áfengu drykkjum og svo var ég með kökur og súkkulaði. 

Þegar Ásdís Rán er spurð að því hvernig það leggist í hana að vera orðin fertug segist hún bara nokkuð brött. 

„Þetta byrjar bara vel. Það er svolítið skrýtið að vera komin upp í þessa tölu en ég þakka bara fyrir þessi 40 ár sem ég hef fengið að njóta og tek vonandi næstu 40 árin með stæl líka. 

Nú er fjölskyldan hins vegar komin heim því skólinn er að byrja og allt að komast í rútínu hjá Ásdísi Rán og börnunum. 

„Ég kem til með að halda áfram sem einkaþjálfari í World Class og er að byrja að bóka á mig kúnna í þjálfun í vetur.“

mbl.is