Elín Anna Gísladóttir, frambjóðandi Viðreisnar í Suðvesturkjördæmi, og Sigurberg Guðbrandsson kynntust eins og svo mörg íslensk pör, á bar í Reykjavík. Á tíu ára sambandsafmælinu tóku þau ákvörðun um að gifta sig en brúðkaupið fór fram í lok ágúst í miðri kosningabaráttu.
Elín segir að þau hafi ákveðið að gifta sig með eins og hálfs árs fyrirvara en þegar þau settu stefnuna á sumarið 2021 var kórónuveirufaraldurinn ekki byrjaður. „Þetta slapp, þó það hafi kannski staðið tæpt,“ segir Elín Anna. „Það var aðeins meira af afboðunum. Amma mín lenti í sóttkví korter í brúðkaup en þetta hófst.”
„Við áttum tíu ára sambandsafmæli í fyrra. Við fórum á hótel og fögnuðum því. Maðurinn minn keypti hring og hálsmen handa mér. Við vorum á leiðinni út að borða, ég fór í sturtu og hann skrapp á barinn niðri. Þegar ég kem úr sturtunni þá liggur þetta svona á borðinu frammi,” segir Elín Anna sem hugsaði með sér hvort hann væri að biðja sín. „Svo kemur hann upp og er eitthvað tvístígandi þarna. Ég er bara bíddu er þetta bónorð. Já ef þú vilt það segir hann voða vandræðalegur. Við ákváðum í framhaldinu af því að gifta okkur.“
Sigurberg átti eftir að koma unnustu sinni á óvart aðeins nokkrum dögum fyrir brúðkaupið þeirra í lok ágúst með almennilegu bónorði. „Þegar við fórum og hittum prestinn í undirbúningnum sagði ég prestinum þessa sögu. Hann varð svo svaðalega vandræðalegur yfir þessu öllu að þremur dögum fyrir brúðkaupið bað hann mín formlega. Keypti nýjan hring og fór á skeljarnar. Honum fannst svo ekki ganga að hann hefði ekki gert þetta almennilega. Þannig ég fékk eiginlega tvö bónorð,” segir Elín Anna mjög ánægð með nýbakaðan eiginmann sinn.
Elín Anna og Sigurberg tóku sér frí viku fyrir brúðkaupið til þess að undirbúa allt. Á meðan voru þau í hálfgerðri einangrun til þess að forðast smit og sóttkví. Þau giftu sig síðan 28. ágúst í Lágafellskirkju í Mosfellsbæ þar sem þau búa. Veislan fór hins vegar fram í Haukaheimilinu að Ásvöllum þar sem Sigurberg er Hafnfirðingur. „Við skiptum þessu bróðurlega á milli okkar. Það var alveg fyrirfram ákveðið. Strax í upphafi áður en við ákváðum nokkuð annað vorum við staðráðin í því að veislan yrði á öðrum staðnum og brúðkaupið á hinum.“
Brúðkaupið breytti ekki miklu fyrir utan praktísku hliðina en Elín Anna og Sigurberg eiga tvö börn saman. Hún segir að hún finni til öryggis nú þegar þau eru hjón. Svo er bara svo miklu skemmtilegra að tala um manninn sinn en ekki kærastann.
Elín Anna segir að það hafi helst staðið upp úr að brúðkaupið skyldi hafa orðið að veruleika. „Það er ekkert rosalega skynsamlegt að gifta sig í miðri kosningabaráttu. Það tók heilmikla skipulagshæfileika og þolinmæði að púsla þessu öllu saman. Í miðri kosningabaráttu og í miðju covid. Ég var svo hrædd um að vera send í sóttkví að ég þorði varla út í búð. En svo stendur líka uppúr gleðin þennan dag. Ég held að þetta séu skemmtilegustu veislur sem maður fer í, brúðkaupsveislur. Það eru allir svo hamingjusamir. Veislan með vinum og fjölskyldu var frábær og fullkomnaði annars frábæran dag.
„Ég þarf alltaf að hafa nóg að gera,” segir Elín Anna að lokum sem vonast til þess að komast á þing en hún skipar þriðja sæti Viðreisnar í Suðvesturkjördæmi. Ef hún fengi að breyta einhverju við brúðkaupið hefði hún viljað drífa sig strax í brúðkaupsferð. Brúðkaupsferð til framandi áfangastaðar verður hins vegar að bíð í ljósi kosningabaráttu og heimsfaraldurs.