Rassummál sænsku glamúrfyrirsætunnar Natöshu Crown er komið upp í 210 sentímetra en hana langar að vera með stærsta rass í heimi. Hún stefnir því enn á ný í rassstækkunaraðgerð og er markmiðið að ummálið verði komið yfir 228 sentímetra eftir hálft ár.
Samkvæmt Daily Mail kom Crown fram í sjónvarpsþætti í Bretlandi á dögunum þar sem hún greindi frá því að hún ætlaði að þyngja sig um 20 kíló til þess að auðvelda aðgerðina. Í aðgerðinni, sem er talin lífshættuleg, er hennar eigin fita færð frá öðrum líkamshlutum á rassinn. Hún hefur áður þyngt sig um 25 kíló en þetta er ekki í fyrsta skipti sem hún fer í rassstækkun eins og þessa. Til að fita sig borðar hún aðallega pítsur og pasta auk þess sem hún borðar sex kíló af Nutella á mánuði.
„Af því að ég er með það markmið að vera með stærsta rass í heimi. Í byrjun var það ekki þannig, það var bara að vera með stærri rass,“ sagði Crown þegar hún var spurð af hverju hún væri að þessu.
Sjálf telur Crown aðgerðina ekki hættulega en viðurkenndi í sjónvarpinu að fjölskylda hennar hefði áhyggjur. „Þau halda að ég muni deyja af því ég bæti svo miklu á mig, þau halda að þetta sé ekki hollt,“ sagði Crown. Hún hefur þó engar áhyggjur og vill að fólk viti að hún æfir á hverjum degi, hún sé ekki bara að borða. Hún æfir til þess að viðhalda vöðvum á réttum stöðum og henni líður eins og hún sé hraust.