Þórdís Kjartansdóttir lýtalæknir svarar spurningum lesenda Smartlands. Hér fær hún spurningu frá konu sem finnur fyrir sting í brjósti en hún er með sílikon fyllingu í brjóstunum. 

Hæ hæ,

ég er með sílikon í brjóstum og hefur verið ekkert mál en fyrir svona viku fór mér að finna til í vinstra brjóstinu og fá einhvers konar stingi og virðist vera rendur eða rákir í púðanum eins og það sé pínu aflagað í vissum stellingum. Hvað getur verið að? Ég var með púða í 15 ár ekkert vesen og var svo skipt fyrir 5 árum læknir mælti með því.

Kveðja, K

Sæl og takk fyrir spurninguna.

Þegar „rendur eða rákir“ koma í ljós í brjóstum með sílikon fyllingu eins og þú lýsir, þá er yfirleitt brjóstvefurinn að þynnast framan við fyllinguna. Kannski hefur þú lagt af? Gæti líka verið vegna nýlegrar brjóstagjafar? Svo er þetta meira áberandi ef púðinn er framan við vöðva (pre-pectoral). Fyrst þú lýsir „einhvers konar stingum“ þá gæti þykkari örvefur verið að myndast hjá þér umhverfis púðann. Þá geta krumpur og fellingar komið meira í ljós. Þá getur verið gott að nudda brjóstið reglulega í nokkrar vikur og sjá hvort þetta jafni sig ekki.

Annars ráðlegg ég þér að panta þér tíma hjá lýtalækninum þínum og skoða hvað hægt sé að gera fyrir þig.

Með bestu kveðjum og gangi þér vel,

Þórdís Kjartansdóttir lýtalæknir. 

Liggur þér eitthvað á hjarta? Þú getur sent Þórdísi spurningu HÉR. Athugið að fullri nafnleynd er gætt. 

Þórdís Kjartansdóttir lýtalæknir. mbl.is/Árni Sæberg

Tengdar fréttir

Spurðu lýtalækninn

Geta karlar farið í svuntuaðgerð?

• Er fólk einhvern tímann of gamalt fyrir svuntuaðgerðir?
• Hvað þarf fólk að vera þungt ef það ætlar í aðgerð?
• „Fólk getur helst ekki farið oftar en tvisvar í andlitslyftingu“
• „Fólk kemur í bótox og fylliefni og fer beint í vinnuna eða á fund“

» Fleiri tengdar fréttir

• Blogga um frétt