Flottustu konunglegu kjólarnir árið 2022

Í ár sýndu kvenkyns meðlimir evrópskra konungsfjölskyldna sínar bestu hliðar og klæddust fjölmörgum glæsikjólum við hátíðleg tækifæri. Smartland tók saman eftirminnilegustu kjólana.

Mestu athyglina fékk Katrín prinsessa af Wales en hún þykir sjaldan slá feilnótu hvað klæðaburð varðar. Hún er íhaldsöm og heldur sig oftar en ekki við breska hönnuði á borð við Jenny Packman og Alexander McQueen. Stundum stígur hún þó út fyrir kassann og klæðist til dæmis aðeins meira töff merkjum eins og Vampires Wife og Solace London. Doppur voru vinsælar hjá Katrínu í sumar og klæddist hún ýmsum afbrigðum af doppóttum kjólum við hin og þessi tækifæri.

Þá var ánægjulegt að sjá Charlene prinsessu aftur á meðal fólks eftir erfið veikindi en hún þykir mjög smekkleg og hefur einstaklega gott auga fyrir tísku. 

Yngri prinsessurnar eru einnig farnar að láta til sín taka en helst má geta Ísabellu prinsessu sem er mjög oft í töffaralegum buxnadrögtum. Þá verður áhugavert að fylgjast með hvernig fatastíll Ingiríðar Noregsprinsessu og Katrínu krónprinsessu Hollands þróast þegar sviðsljósið beinist í auknum mæli að þeim.

Græni liturinn var einnig afar vinsæll hjá drottningum og prinsessum í ár og voru Katrín og Charlene báðar í mjög eftirminnilegum grænum síðkjólum.